Astanada polıtseıler men muǵalimderdi koronavırýsqa qarsy vaktsınalaý jalǵasýda
Qala ákimdiginen málim etkendeı, polıtseıler arasynda vaktsına aldymen, turǵyndarmen tyǵyz baılanysta bolatyn, vırýs juqtyrý qaýpi joǵary qyzmetkerlerge salynady. Olardyń arasynda ýchaskelik polıtsııa ınspektorlary, potrýldik polıtseıler, ıývenaldyq polıtsııa jáne ózge de mamandar bar.
Vaktsınatsııa jasalmas buryn dáriger mindetti túrde dene temperatýrasyn, júrek qaǵysyn, arterııalyq qan qysymyn, tynys alýyn jáne júrek-qan tamyrlary júıesin, aýyz qýysyn tekseredi, epıdemıologııalyq anamnez naqtylanady.
Vaktsınatsııaǵa tek ekpege qarsy kórsetilimi joq qyzmetkerler kirgizildi.
Potrýldi polıtsııa qyzmetiniń ınspektory Aıbek Quramysov vaktsına alǵannan keıin ózin qalaı sezinetinin aıtyp berdi.
«Medıtsınalyq tekseristen keıin vaktsınanyń birinshi komponentin aldym. Ózimdi qalypty sezinip turmyn, jumys ornyndamyn. Vaktsınatsııanyń vırýspen kúreste kómegi tıetinine senimdimin. Pandemııa bastalǵannan beri polıtsııa qyzmetkerleri túrli jaǵdaımen ushyrasyp, vırýs juqtyrý qaýpi joǵary aımaqtarda aldyńǵy shepte júr ǵoı», – dedi polıtsııa aǵa leıtenanty.
Aıta ketsek, vaktsınatsııa Nur-Sultan qalasy Polıtsııa departamentiniń emhanasynda ótti.
№85 mektep-lıtseıiniń bastaýysh synyp muǵalimi Aınur Janserikova vaktsınany eń birinshi kezekte óziniń oqýshylarynyń qaýipsizdigi úshin qabyldaǵanyn jetkizdi.
«Bizge naqty nusqama berildi jáne aldaǵy 3 kúnde bolýy múmkin sımptomdar týraly túsindirdi. Qysqa-nusqa, bári túsinikti jazylǵan. Biz elimizdiń azamaty jáne patrıottary retinde ekpe alý úshin keldik. Qanshama oqýshymen baılanysta bolamyz. Sondyqtan olardyń, ózimizdiń jáne jaqyndarymyzdyń qaýipsizdigi úshin vaktsına saldyratyn boldyq. Bizdi eshkim kúshtep, májbúrlep jatqan joq. Ekpe saldyrýǵa taǵy 7 áriptesim birge keldi», – dedi Aınur Janserikova.
Ekpe salynatyn adamǵa protsedýra ótkizý algorıtmi kórsetilgen «patsıentter marshrýty» beriledi.
«Aldyn ala jasalǵan tizim boıynsha azamattardy ekpe salýǵa shaqyramyz. Jalpy tekserýden ótedi, qajetti málimetter beriledi. Odan keıin patsıenttiń kelisimi alynyp, ekpe salynady. Ekpeden soń 30 mınýt bizdiń baqylaýymyzda bolady. Eger eshqandaı allergııalyq reaktsııa baıqalmasa úıine jiberemiz»,- dedi «Shıpager» emhanasynyń jalpy tájirıbe dárigeri Sandýǵash Zulpuharova.
Dárigerdiń aıtýynsha, 18 jasqa deıingi balalarǵa, júkti áıelderge, JRVI sımptomdary bar, sonymen qatar sońǵy 6 aıda koronavırýspen aýyrǵan azamattarǵa ekpe salynbaıdy.
Ekpe jasalǵannan keıin 3 kún boıy monshaǵa barýǵa, ıaǵnı ekpe ornyn sýlaýǵa bolmaıdy. Spırttik ishimdik ishýge jáne aýyr jumys isteýge de tyıym salynǵan.
Esterińizge salsaq, Qazaqstanda vaktsınatsııa kezeń-kezeńimen júrgizilýde. Birinshi kezeńde, koronavırýs ınfektsııasyna qarsy vaktsınany ınfektsııalyq aýrýhanalardyń dárigerleri, jedel medıtsınalyq járdem stantsııalarynyń, jansaqtaý bólimderiniń, aýrýhanalardyń qabyldaý bólimderiniń, sanepıdqyzmet jáne basqa da bólimderdiń mamandary qabyldady. 1 naýryzdan bastap vaktsınatsııanyń ekinshi kezeńinde polıtseıler men muǵalimderge jáne medıtsınalyq uıymdardyń basqa da bólimderiniń qyzmetkerlerine ekpe salynýda. Al vaktsınatsııanyń úshinshi kezeńinde sozylmaly aýrýlary bar jáne basqa da sanattaǵy azamattar qamtylady. Jyl sońyna deıin Qazaqstanda vaktsına qabyldaǵan azamattar sanyn 6 mıllıonǵa jetkizý kózdelip otyr.
