Astanada polıtseı kelinshek eki balany órtten qutqaryp qalǵan
ASTANA. QazAqparat – Astananyń Polıtsııa departamentine qala shetindegi Qoıandy kentiniń turǵynynan hat kelip túsken. Hatta Astana qalasy PD Kınologııalyq qyzmet ortalyǵynyń kishi ınspektor kınologi, polıtsııa starshınasy Aqbota Eńsebaevaǵa alǵysyn bildirgen, dep habarlaıdy QazAqparat.
Órt 11 jeltoqsanda keshki saǵat 22.30 shamasynda bolǵan. Jer úıde otbasyndaǵy 3 úlken adam men 4 jáne 7 jas shamasyndaǵy eki bala osy ýaqytta eshteńeni sezbegen. Árqaısysy óz isimen shuǵyldanyp otyrǵan: úlken balasy sabaq qarap, qalǵany kúndelikti isterimen aınalysyp júrgen. Órttiń tutanǵanyn da eshkim bilmegen.
Al qarama-qarsy úıde turatyn polıtsııa qyzmetkeri birinshi bolyp órtti baıqaǵan. Aqbota kúıeýimen birge dalaǵa júgirip shyǵyp, janyp jatqan úıdiń buryshyn sóndirýge kirisken.
Turǵyndardyń aıtýy boıynsha, eger Aqbota men kúıeýi bolmaǵanda órttiń saldary apatqa ákep soqtyrýy yqtımal edi. Aıta keterligi, Aqbota jáne Hamıt Eńsebaevtar kórshilerine qıyn jaǵdaıda da qol ushyn sozýda. Úıleri órtengen otbasy bir apta boıy tatý solardyń úıinde turyp jatyr, olardyń ózi de eki mektep oqýshysyn tárbıelep otyr. PD Kınologııalyq qyzmetiniń kishi ınspektor kınologi, polıtsııa starshınasy Aqbota Eńsebaeva balalardy qutqaryp qalǵanyn qysqasha ǵana aıtyp berdi. Ol Astana qalasy kınologııa qyzmetinde 12 jyl qyzmet atqarady.
