Astanada pnevmonııamen 192 bala aýrýhanada em alyp jatyr
ASTANA. KAZINFORM — 23 qyrkúıektegi jaǵdaı boıynsha Astana statsıonarlarynda pnevmonııa dıagnozymen 270 adam em alyp jatyr. Onyń 192-si — bala, bireýi — júkti áıel. Bul týraly Astana qalasynyń Qoǵamdyq densaýlyq saqtaý basqarmasy basshysynyń orynbasary Aıdyn Ashımhanov elordalyq Kommýnıkatsııalar qyzmetinde ótken brıfıngte málimdedi.
Onyń aıtýynsha, qalada JRVI, tumaý jáne COVID-19 boıynsha epıdemıologııalyq ári zerthanalyq baqylaý 8 medıtsınalyq uıymda júrgiziledi. Tumaýǵa uqsas belgileri bar naýqastardan synama alynyp, vırýs anyqtalǵan úlgilerge qosymsha genetıkalyq zertteý júrgiziledi.
— Maýsymdyq syrqattaný kóbeıgen kezde turǵyndarǵa medıtsınalyq kómekti der kezinde kórsetý úshin qalada 87 súzgi kabıneti jumys isteıdi. Olar jumys kúnderi saǵat 08:00–den 20:00–ge deıin, demalys jáne mereke kúnderi 08:00–den 18:00–ge deıin qabyldaıdy, — dedi Aıdyn Ashımhanov.
Spıkerdiń sózinshe, qajet bolǵan jaǵdaıda statsıonarlarda qosymsha tósek oryndary ashylyp, qoldanystaǵy tósek qory naýqastar sanyna qaraı qaıta beıimdeledi.
— Úıde medıtsınalyq kómek kórsetý úshin mobıldi brıgadalar jumys isteıdi. Júkti áıelder men bir jasqa deıingi balalardan túsken shaqyrtýlarǵa birinshi kezekte qyzmet kórsetiledi, — dedi ol.
Aıdyn Ashımhanovtyń aıtýynsha, medıtsınalyq uıymdar qajetti dári-dármekpen, medıtsınalyq buıymdarmen jáne jabdyqtarmen qamtamasyz etilgen.
Sondaı-aq syrqattaný deńgeıi, emhanalar men statsıonarlarǵa túsetin júkteme jáne jedel járdemge túsetin shaqyrtýlar kún saıyn baqylanady. Qajet bolǵan jaǵdaıda osy málimetter negizinde patsıentter aǵyny qaıta bólinedi.
Buǵan deıin Astanada balalar arasynda JRVI-men syrqattaný 24%-ǵa óskeni habarlanǵan edi.
