Astanada plastık qaldyqtar arnaıy konteınerlerge jınalady
ASTANA. QazAqparat - Astanada plastık jınaýǵa arnalǵan konteınerler paıda bolady. Aldymen 588 aýlaǵa 686 konteıner qoıylady. Tıisti jumystar bastalyp ketti, jospar boıynsha aptasyna 50 bak ornatylmaq, dep habarlaıdy astana.kz.
- Ótken jyly pılottyq rejımde osy sııaqty joba iske qosylǵan bolatyn. Onyń qalaı jumys isteıtinin kórgimiz keldi. Ol joly plastık, qaǵaz jáne shyny jınaýǵa arnalǵan úsh konteınerden qoıyldy. Sonda páterde qoqysty tórt bólip jınaý kerek boldy. Bul yńǵaısyz ári durys emes. Sondyqtan, júıeni birtindep engizemiz dep sheshtik, - deıdi «Astana-Tazartý» JShS bas dırektory Ivan Lavrınenko.
Onyń aıtýynsha, plastık jınaýǵa arnalǵan konteınerlerdi ornatý jumystary 3-4 aıdyń ishinde bitedi, sodan soń makýlatýraǵa, keıinnen shyny jınaýǵa arnalǵan jáshikter qoıylady.
- Qazirgi kezde bul másele áleýmettik jelilerde belsendi talqylaný ústinde, adamdarǵa unady. Sondaı-aq, eriktiler de tartylady, túsindirý jumystary júrgiziledi, jarnamalar ilemiz. Menińshe, adamdar qoqysty bólip tastaıtyn bolady. Endi ony isteý ońaı jáne yńǵaıly etedi. Mysaly, plastık jınaý úshin ashyq tor konteıner qoıamyz, sáıkesinshe, onda bótelkelerdi tastaý qıyn bolmaıdy. Negizinen, bul jerde psıhologııalyq ta aspekti bar, tártipti bolý kerek. Adamdar plastıkti bólek jınaýdy ádetke aınaldyrǵanda, ol qaǵazdy da, shynyny da bólek tastaıtyn bolady, - dep sanaıdy Ivan Lavrınenko.
