Astanada pırotehnıkalyq zattardyń satylýyn baqylaý boıynsha reıd júrip jatyr

ASTANA. KAZINFORM — Jańa jyl merekesi qarsańynda Astanada pırotehnıkalyq zattardyń satylýyn baqylaý maqsatynda reıd júrip jatyr, dep habarlaıdy elorda ákimdiginiń resmı saıty.

Pırotehnıkalyq ónimder satylatyn saýda oryndaryn tekserý 23 jeltoqsan kúni bastalyp, 3 qańtarǵa deıin jalǵasady. Reıdterdi Astana qalasynyń Polıtsııa departamenti men Tótenshe jaǵdaılar departamentiniń qyzmetkerleri birlesip ótkizip jatyr.

Taǵy bir aldyn alý sharasy Baıqońyr aýdanynda júrgizildi. Vedomstvo ókilderi pırotehnıkalyq zattar satatyn bazarlardy, dúkenderdi, saýda oryndaryn tekserdi.

«Jańa jyl qarsańynda elorda turǵyndary otshashýdy belsendi túrde satyp alyp jatyr. Osyǵan oraı, aýdandaǵy turǵyndar kóp júretin oryndarda pırotehnıkalyq zattardyń zańsyz aınalymynyń jolyn kesý, azamattardyń qaýipsizdigin qamtamasyz etý jáne satý erejeleriniń saqtalýyn qadaǵalaý maqsatynda reıdter júrgizildi. Sondaı-aq, pırotehnıkalyq zattardy paıdalaný kezinde órt qaýipsizdigi erejelerin saqtaý mańyzdylyǵyn eske salamyz. Otshashýdy iske qosqan kezde turǵyn úılerden jáne elektr symdarynan keminde 50 metr alysqa shyǵyńyz. Satyp alý aldynda satýshydan sertıfıkat surap, saqtaý merzimin tekserińiz. Kóptegen adam paıdalaný nusqaýlaryn elemeıdi. Alaıda bul óte qaýipti. Pırotehnıkany durys qoldanýdy mindetti túrde úırenińiz. Balkondar men terezelerden otshashýlardy atpańyz – bul órtke ákelýi múmkin», - dedi Baıqońyr aýdany Tótenshe jaǵdaılar bóliminiń bas mamany Aıan Kantek.

Reıd barysynda aýdanda pırotehnıkalyq zattardy zańsyz satý faktileri anyqtalǵan joq.

Uıymdastyrýshylar jańa jyl qarsańynda pırotehnıkalyq zattardy durys paıdalanbaýǵa baılanysty oqıǵalardyń sany aıtarlyqtaı artqanyn eskertedi. Sondyqtan elorda turǵyndary saq bolyp, qaýipsizdik erejelerin saqtaýy kerek.