Astanada «Pırotehnıka» jedel aldyn alý sharasy ótip jatyr

ASTANA. QazAqparat - Elordada Jańa jyl merekesi qarsańynda «Pırotehnıka» jedel aldyn alý sharasynyń ekinshi kezeńi ótip jatyr. Atalǵan shara Astana qalasynyń TJD men ІІD birlesip uıymdastyryldy, dep habarlaıdy qalalyq ákimdiktiń baspasóz qyzmeti.

Reıd sharalary barysynda pırotehnıkalyq ónimderdi zańsyz satýdyń tórt deregi tirkeldi.

Elordanyń Ortalyq bazarynda tekserilgen úsh núkteniń bireýi ǵana zańdy túrde jumys istegen. Qalǵan eki satýshy ónimderdi ruqsat beretin qujattarsyz jáne ashyq aýada satqan.

«Eki derek boıynsha ákimshilik sıpattaǵy sharalar qabyldaıtyn bolamyz. Materıaldardy sotqa joldap, pırotehnıkalyq buıymdardy tárkileımiz», - dep atap kórsetti Astana q. ІІD ákimshilik polıtsııa basqarmasynyń azamattyq jáne qyzmettik qarý-jaraq aınalymyn baqylaý bóliminiń aǵa ınspektory Ádilhan Bashaev.

«Erejege sáıkes, petardalar men otshashýlardy órt sóndiretin bastapqy quraldary bar jabyq nysanda saqtap, satýǵa bolady. Ǵımarattyń ózi avtomatty órt dabylymen bloktanyp, ishinde jaryq bolýy tıis», - dep naqtylady Astana q. TJD bas mamany Aıtbaı Ábdirahmanov.

TJD qyzmetkerleri pırotehnıka ónimderin satyp alýda onyń nusqaýlyǵymen tanysýǵa keńes beredi, nusqaýlyqtyń bolmaýy taýardyń sertıfıkattalmaǵanyn, demek densaýlyq úshin qaýipti ekenin bildiredi. Qaptamanyń jáne ónimniń bútindigine nazar aýdarý qajet. Sondaı-aq, árqashan qarapaıym erejeni este ustaý qajet: petardalardy otshashýlardy, zymyrandardy ǵımarat ishinde jaǵýǵa bolmaıdy, jáne olardy balkondar men lodjııalardan, jańajyldyq shyrshalardyń, turǵyn úı jáne sharýashylyq nysandardyń qasynda paıdalanýǵa bolmaıdy.