Astanada PIK jumysyn jetildirý sharalary talqylandy
ASTANA. QazAqparat - Astanada qalalyq máslıhattyń turaqty komıssııasynda PIK jumysyn jetildirý máseleleri talqylandy. Bul týraly elorda ákimdiginiń resmı saıtynda habarlady.
Búgingi kúni elordada 2392 kóp páterli turǵyn úı bar, olarǵa 419 páter ıeleri kooperatıvi qyzmet kórsetedi jáne statıstıka kórsetip otyrǵandaı, PIK-ke qatysty shaǵymdar jyldan-jylǵa azaımaı otyr.
«Basty másele - kondomınıýmdardy tirkeýdiń álsizdigi. Qurylys júrgizýshiler jáne PIK qarapaıym sebeppen olardy tirkeý boıynsha jumys júrgizýge qulyqsyz, PIK-ter ortaq múlikti turǵyndardyń kelisiminsiz paıdalanady. PIK-ter - jertóle oryndaryn, al qurylys júrgizýshiler tehnıkalyq qabattardy jalǵa tapsyrady», - deıdi elordalyqń Turǵyn úı ınspektsııasynyń basshysy Álıhan Qýatbekov.
Á. Qýatbekovtyń aıtýynsha, turǵyndardyń 40%-ynan shaǵymdar tek osy másele boıynsha ǵana túsedi. Sondaı-aq, turǵyndar PIK-terdiń qyzmet kórsetý sapasyna qanaǵattanbaıdy. Bul máseleni ol tıimsiz PIK-terdi qysqartyp, basqarýshy servıstik kompanııalardy qurý arqyly sheshýge bolady deıdi.
«Astanada jumys isteıtin ondaı 18 uıymnyń tájirıbesi boıynsha nátıje bar. Materıaldyq-tehnıkalyq bazasy jáne bilikti kadrlary bar basqarýshy kompanııalar kez kelgen kólemdegi jumysty atqarýǵa qabiletti. 2392 turǵyn úıge ondaı 45-50 fırma qajet bolady», - deıdi Á. Qýatbekov.
