Astanada pıanınoshy N. Ysmaıylovtyń «Fortepıanolyq mýzyka keshi» atty jeke kontserti ótedi
ASTANA. QazAqparat - 28 qańtarda «Astana Opera» teatrynyń Kameralyq zalynda asqan sheber pıanınoshy Nurlan Ysmaıylovnyń «Fortepıanolyq mýzyka keshi» atty jeke kontsertin ótkizedi. Shara kemeńger kompozıtor Frederık Shopennyń týǵanyna 205 tolýyna oraılastyrylǵan, dep habarlady teatrdyń baspasóz qyzmeti.
Kesh baǵdarlamasy polshalyq uly kompozıtor jáne asa kórnekti pıanınoshynyń shyǵarmalarynan turady. Birinshi bólimde 24 kirispe (or.28) oryndalsa, ekinshisinde - tórt ballada usynylady.
Qazaqstan Respýblıkasynyń eńbek sińirgen qaıratkeri Nurlan Ysmaıylov, atalǵan mýzykalyq týyndylar Shopen shyǵarmashylyǵynyń jaýharlary ekenin atap ótti. «Tipti, onyń da eńbekteriniń ishinde kórnekti jáne sonshalyqty jarq etip kózge túse qoımaǵandary kezdesedi. Bul kontsertte men Shopennyń tereń oıly, este qalarlyq týyndylaryn oryndaımyn. 24 kirispe - bul barlyq 24 úndestilikti bir ıdeıanyń tóńireginde toǵystyratyn úzilmeıtin tsıkl. Eńbek jolynda kompozıtor 24 kórkem shyǵarmasyn dúnıege ákeldi jáne aıta keterligi, solardyń árqaısysynda kompozıtorlyq tapqyrlyq pen tehnıkaǵa erik berilgen», deıdi mýzykant.
Onyń aıtýynsha, osy shyǵarmalardyń barlyǵy kompozıtordyń ómirbaıanynan syr shertedi. «Bizder, oryndaýshylar úshin de, olar bizdiń ómirimizdiń aınasy ispettes ekenin aıta keteıin. Mundaǵy aıtaıyn degenim, onyń keıbir týyndylaryn on segiz jastaǵy bozbala kezimde oryndasam, keıin 25, 35, 60 jasymda oınadym, sonda, ár kezde jańasha oryndaımyn. Jas kezimde ózimdi, ózimniń «menmendigimdi» kórsetkim keldi. Al qazir tereń boılaýǵa tyrysamyn. Kez kelgen mýzykant eseıgende óz shyǵarmashylyǵyna áldebir baǵa beredi dep oılaımyn, al keıde tipti tanymastaı ózgerip ketedi. Aıqyn mysal retinde ustazym, asa kórnekti pıanınoshy E. Gılelsti aıta alamyn, onyń kemel shaǵyndaǵy oryndaýynan názik fılosofııalyq saryndy baıqaısyń», - deıdi Nurlan Ysmaıylov.
Nurlan Ysmaıylov Chaıkovskıı atyndaǵy Máskeý memleketitk konservatorııasyn professorlar V.I. Nosov pen N.P. Emelıanovtyń klasy boıynsha (1970-1975), assıstentýra-taǵylymdamany KSRO halyq ártisi E. Gılelstiń klasynda (1975-1978) támamdaǵan. Jalpyodaqtyq konkýrsta (1977) jáne S. Rahmanınov atyndaǵy halyqaralyq konkýrsta (1983) arnaıy syılyqtardy ıelengen.
