Elordada pedagogtarǵa arnalǵan tamyz konferentsııasy ótti
ASTANA. KAZINFORM – Astana qalasynyń ákimi Jeńis Qasymbek Instagram paraqshasynda tamyz konferentsııasynda kóterilgen máseleler týraly jazdy. Bul týraly elorda ákimdiginiń resmı saıty habarlady.
«Jańa oqý jylynyń bastalýyna eki aptadaı ýaqyt qaldy. Birinshi synypqa baratyn oqýshylar úshin ómirindegi jańa ári jaýapty kezeń bastalady, al joǵary synyp oqýshylary úshin — bolashaq mamandyǵyn anyqtaıtyn ýaqyt. Ustazdarymyz balalarymyzǵa bilim berip qana qoımaı, olardyń áleýetin ashýǵa, boıyndaǵy erekshe qasıetterin tanytýǵa kómektesedi. Búgin dástúrli 2024 tamyz forýmy ótip, negizgi baǵyttar talqylandy», — dep jazdy Jeńis Qasymbek.
Ákimniń aıtýynsha, birinshi bilim oshaqtaryna basa nazar aýdarylyp otyr.
«Qala turǵyndarynyń jyl saıynǵy ósimin eskere otyryp, elordada mektepter kóptep salynyp jatyr. Qazirgi ýaqytta eki aýysymda 100 myńǵa jýyq oqýshyǵa arnalǵan 30-dan astam mekteptiń qurylysy júrip jatyr. Jańa oqý jyly ishinde 20-dan astam mektep ashamyz. Olardyń bir bóligi — jaıly mektepter. Memleket basshysynyń tapsyrmasy boıynsha „Jaıly mektep“ ulttyq jobasy aıasynda Samruk-Kazyna Construction 90 myń oqýshy ornyna arnalǵan 24 jaıly mektep (2024-2025 jyldar aralyǵynda) salady», — dep jazdy qala ákimi.
Jeńis Qasymbektiń jazýynsha, budan ózge memlekettik balabaqshalardyń qurylysy qaıta jandandy, buǵan qosa jeke balabaqshalarǵa memlekettik tapsyrys berý ary qaraı jalǵasady.
Ekinshi. Kadrlar daıarlaý
Jyl saıyn biz kolledjderge de, joǵary oqý oryndaryna da granttar bólemiz. Bıyl JOO-ǵa 850-ge jýyq grant bóldik. Sondaı-aq, pedagogtarymyzdy biliktiligin arttyrýǵa jiberemiz.
Úshinshi. Áleýmettik kómek
Jalpyǵa birdeı oqytý aıasynda 12 myńnan astam oqýshy kómek aldy. Al materıaldyq kómek mólsheri 43 myń teńgeden asady. Sonymen qatar, mektep kıimin satyp alýǵa arnalǵan ózge de baǵdarlamalar bar, onyń ishinde demeýshilik qarajat ta tartylady.
Tórtinshi. Stýdenttik jataqhanalar
«Jaýapty mınıstrlikpen, ýnıversıtettermen, ınvestorlarmen birlesip, jataqhanalarda oryn sanyn arttyrý boıynsha jumys isteımiz. Bıyl Astanada 4,5 myń orynǵa arnalǵan 6 stýdenttik jataqhana salynady. Taǵy 4 ýnıversıtetke jataqhana salý úshin jer telimderi bólindi. 2025 jyly taǵy 2 jataqhanany paıdalanýǵa berý josparlanyp otyr. Osy sharalardyń barlyǵy oqýshylarymyz ben ustazdarymyzdy qoldaýǵa baǵyttalǵan. Biz tıisti jaǵdaı jasaý boıynsha ary qaraı da jumys isteımiz», — dep jazdy Jeńis Qasymbek.
