Astanada Paıǵambardyń (s.ǵ.s) týǵan kúnine arnalǵan «Qosh keldiń, Máýlit!» rýhanı keshi ótti

Astana qalasy ákimdiginiń qoldaýymen, «Nur Astana» ortalyq meshitiniń uıymdastyrýymen ótken keshtiń maqsaty musylman jurtshylyǵynyń basyn qosyp, tańdaýly tulǵanyń taǵylymǵa toly ómirbaıany men ósıetterin jan-jaqty nasıhattaý jáne oǵan degen úmbettiń súıispenshiligin oıatý boldy.

Keshtiń bismillási musylmandyq tápsimizge saı rýhanı tiregimiz, baǵyt-baǵdarymyz ben altyn qazynamyz sanalatyn Qasıetti Qurandy oqýdan bastaldy. Odan keıin Qazaqstan Musylmandary dinı basqarmasynyń naıb múftıi, «Nur Astana» ortalyq meshitiniń bas ımamy Qalıjan Zańqoev keshke jınalǵan kópshilikke arnap óz lebizin bildirdi. Q.Zańqoev, Máýlit keshiniń maqsaty Paıǵambardyń (s.ǵ.s.) týǵan kúnin toılaý emes, júreginde ımany bar musylmanǵa onyń júrip ótken ómirin úıretý, onyń ıgi isterin boıǵa sińirý ekendigin atap kórsetti. «Kimde-kim Máýlit oqylatyn jerge qadam basyp baratyn bolsa, ol jánnattyń baqshalarynyń birine qadam basqandaı bolady», - dedi ol.

Sahna tórinde sondaı-aq, paıǵambardyń dúnıeden ozǵan 63 jasyna teń Astana medresesiniń 63 shákirti Máýlit salaýatyn oqydy. Iláhı án-jyrlar keńinen shyrqaldy. Óziniń Máýlitke arnaýyn aıtysker aqyn Balǵynbek Imashev ta jetkizdi. Muhammed Paıǵambardyń ózin Allahtyń elshisi ekendigin moıyndatý jolynda kórgen qııameti jaıynda, ómiriniń sońyna deıin onyń qamqorshysy bolǵan ákesiniń baýyry Ábý Tálip týraly baıan etetin kórinis sahnalandy.

Odan keıin, Q.Zańqoev pen S.Seıfýllın atyndaǵy Qazaq agrotehnıkalyq ýnıversıtetiniń rektory Aıtbaı Bulashev ýnıversıtet qabyrǵasynda Paıǵambar (s.ǵ.s.) jaıly shyǵarma jazýdan ótken baıqaýdyń úsh jeńimpazyn marapattady.

Kelýshiler nazaryna sonymen birge, 2010 jyly qurylyp, bir jyldyń ishinde qyrýar ıgi sharýalardy atqaryp úlgergen «Meıirimdilik joly» qoǵamdyq qory týraly beınerolık usynyldy. Qoǵamdyq qor búginde Astana men qala syrtyndaǵy eldi mekenderde turatyn, kóptiń kóshine ilesýge jaǵdaılary joq otbasylar men azamattarǵa kómek qolyn sozyp otyr. Qor Ramazan aıynda jamaǵatqa arnap aýyzasharlar berip, Qurban aıt merekesinde áleýmettik álsiz jandarǵa azyq-túliktermen birge qurbandyq etterin úlestirdi. Qoǵamdyq qor Qasıetti merekede Mońǵolııada da qurbandyq shalyp, ondaǵy qandastarymyzdyń kóńilderin bir marqaıtyp qaıtty. Sonymen birge, Afrıka elinde aýyz sýdan tarshylyq kórip, aıyqpas keselderge dýshar bolyp jatqan halyqqa búkil Qazaq jurtynyń atynan qudyq qazýǵa qarajat bóldi.

Іs-shara musylman jurtynda dinı saýattylyqty arttyrýǵa negizdelgendikten, «Súnnetke beriksiń be?» suraq-jaýap oıyny da ótkizildi. Júzden júırik sýyrylyp shyqqan úshinshi-tórtinshi synyptyń oqýshylary men jas órender qoıylǵan suraqtarǵa múdirmeı jaýap berdi.

Al saraıdyń foıesinde «Meıirimdilik joly» qaıyrymdylyq qorynyń kórme-jármeńkesi ótti.

Eske salaıyq, Máýlit án-Nábı Paıǵambardyń (s.ǵ.s.) týylǵan kúnin qasıetti mereke retinde atap ótý úrdisi ıslam áleminde hıjrı IV-V ǵasyrlardan bastalady. Islam ǵulamalary bul jaıly kóptegen qundy eńbekter jazyp, Máýlittiń dinimizdegi ornyn anyqtaýǵa tyrysqan. Qazirgi tańda bul meıramdy bir-eki memleketten ózge barlyq ıslam álemi erekshe merekeleıdi.

Máýlit - arab sózi, qazaq tilinde «týǵan kún» degen maǵyna beredi. Bul Alla taǵalanyń eń súıikti pendesi, Adam atadan (ǵ.s.) bastalǵan paıǵambarlardyń sońǵysy, ári sardary hazreti Muhammedtiń (s.ǵ.s.) dúnıege kelgen aıyna ataý etip qoıylǵan sóz. Qasıetti Quran Kárimde Alla taǵala «Ahzab» súresiniń 56-aıatynda: «Paıǵambarǵa (s.ǵ.s.) Alla rahymyn tógip, perishteler jarylqaý tileıdi. Eı, múminder! Paıǵambarǵa (s.ǵ.s.) sender de salaýat aıtyp, sálem joldańdar», - degen.

Sondyqtan da ár jyly aı tizbesiniń rabıǵýl-áýýál aıynda áz Paıǵambarymyzdyń máýlitin merekelep, Alla taǵala bizdi óziniń súıikti paıǵambary hazreti Muhammedtiń (s.ǵ.s.) úmmeti etip jaratqanyna alǵysymyzdy bildirip, súıikti habıbine jamaǵat bolyp salaýattar aıtamyz.