Astanada pavlodarlyq qalamgerlerdiń jańa shyqqan kitaptarynyń tusaýkeseri ótedi
ASTANA. 14 maýsym. QazAqparat - Búgin (saǵ. 15.00-de) Qazaqstan Respýblıkasy Ulttyq akademııalyq kitaphanasynda pavlodarlyq qalamgerlerdiń jańa shyqqan kitaptarynyń tusaýkeseri ótedi. Ádebı eńbekter «Folıant» baspasynan jaryq kórip otyr.
Astana jurtshylyǵy erteń kıeli Ertis óńiriniń Aqyn Alaqan, Arman Qanı, Súleımen Baıazıtov jáne Vıktor Semerıanov syndy mańdaı aldy aqyn-jazýshylarynyń týyndylarymen tanysa alady. Bul tórt qalamger de Qazaqstan Jazýshylar odaǵynyń músheleri.
Aqyn Alaqanulynyń «Qarasaı men Qyzylsaı» kitabynda shyǵarmalar shynaıy sezim shattyǵymen, ásemdigimen jáne kórkem obrazdyń aıqyndyǵymen, ótkir sýretimen, keń tynysty oı-órnekterimen, qoǵamnyń saıası-áleýmettik ómirine asqaq daýyspen ún qosýymen erekshelenedi.
Súleımen Baıazıtov «Alash arystary» kitabynyń taqyryptyq aýmaǵy óte keń. Jeke adamnyń kóńil kúıi arqyly búkil el ómiri, nemese el, jer tarıhyna úńilýinen aqynnyń bıik azamattyq úni, belsendi pozıtsııasy anyq baıqalady.
Arman Qanıdyń «Sen jáne men» kitaby qazaq óleńine ózindik ótkir tartys, sezim kúrdeliligin ákelýmen birge, onyń ýaqytqa jáne keńistikke tán aıasyn keńitýdiń úlgisin kórsete bildi. Sondyqtan da aqynnyń lırıkalyq qaharmandarynyń árqaısysy bir álem.
Vıktor Semerıanovtyń eki tomdyq «ıA jıvý v Kazahstane» kitaby oqyrmandy oı qazynasynyń baılyǵy jáne moldyǵymen, emotsııaǵa toly tereń syrshyldyǵymen baýrap, erekshe áserge bóleıdi.
Sonymen qatar jas qalamgerler jyrlarynan quralǵan «Táýelsizdik tuǵyry» jınaǵyna 2011 jyly Pavlodar qalasynda ótken respýblıkalyq jas qalamgerler festıvaline qatysýshylardyń jyrlary endi.
Aǵa býyn ókilderimen qosa sońǵy ýaqytta ádebıet kerýenine ózine tán qarymdy qalamymen qosylǵan, bolashaǵynan úlken úmit kúttirer pavlodarlyq jas aqyn, Nazarbaev Ýnıversıtetiniń stýdenti S.Dúısenbaıulynyń kitaby da kelýshiler nazaryna usynylady.
Keshke jınalǵan qonaqtar men Astana turǵyndary S.Toraıǵyrov atyndaǵy Pavlodar oblystyq kitaphanasy daıyndaǵan Pavlodarlyq aqyn-jazýshylardyń kitaptarynyń kórmesin tamashalaıtyn bolady. «Ertis-Baıan kitaphanasy» serııasy boıynsha sońǵy jyldary úzdiksiz jarııalanyp kele jatqan áıgili asyldardyń jınaqtary, sondaı-aq jas aqyndar shyǵarmashylyǵy da kórmeniń shyraıyn kirgizeri sózsiz.
«Serpigende bodandyqtyń tumanyn,
Jetti álemge uranym men jyr-ánim» degendeı, táýelsiz elimizdi jyrlaǵan bul ádebı eńbekterdiń maqsaty - halyqtyń rýhanı baılyǵyn arttyrý.
Tusaýkeser keshke Astana jáne Almaty qalasynyń aqyn-jazýshylary shaqyryldy.
Bul sharanyń ótýine Pavlodar oblysynyń mádenıet basqarmasy qoldaý bildirdi.
