Astanada Pavlodar jáne Jambyl oblystary taýar óndirýshileriniń jármeńkeleri ótip jatyr
ASTANA. QazAqparat - Búgin jáne erteń Astana turǵyndary aýyl sharýashylyq jármeńkelerinde tómendetilgen baǵamen azyq-túlik ónimderin satyp ala alady.
Pavlodar oblysynyń jármeńkesi «Han shatyr» SOO aýmaǵynda, Jambyl oblysynyń jármeńkesi qala ákimdiginiń aldyndaǵy alańda ótip jatyr. Jármeńkege Astana ákimi Áset Isekeshev te keldi.
Pavlodar oblysynyń barlyq aýdandarynan 100-den asa kásipker 90 tonna et jáne et ónimderi, 300 tonna kartop, 140 tonna kókónis jáne t.b. ákeldi. Budan basqa, ulttyq taǵamdar, Ertis óńiriniń halyq shyǵarmashylyǵy men qolóner buıymdary usynylady. Elordalyqtar Pavlodar oblystyq fılarmonııasy shyǵarmashylyq ujymdarynyń kontserttik baǵdarlamasyn tamashalaıdy.
- Búgin Pavlodar jáne Jambyl oblystarynyń jármeńkesi ótip jatyr, jármeńkelerde azyq-túlik ónimderi molynan usynylǵan, búgin jáne erteń 40 tonnaǵa jýyq ónim ótkiziledi. Tańǵy saǵat 8-den bastap adamdar kelip jatyr, et ónimderin, kókónister alyp jatyr. Baǵalar 15-20% tómen, keıbir taýarlar Astanadaǵy baǵadan 35% deıin arzan, - dedi Astana ákiminiń orynbasary Malıka Bekturova.
Jambyl oblysynan jármeńkege jalpy somasy 300 mln teńgeni quraıtyn 315 tonna ónim ákelindi. Elorda turǵyndary men qonaqtaryna sapaly, ekologııalyq taza jáne paıdaly ónimniń 30 túri usynylady.
«Qazaqstanda jasalǵan» aktsııa aıasynda aýylsharýashylyq jáne óndiristik kórme uıymdastyrylady.
Aıta keteıik, 23-25 qyrkúıekte elordada Jambyl oblysynyń QR Táýelsizdiginiń 25 jyldyǵyna arnalǵan mádenıet kúnderi ótip jatyr. Bul kúnderi astanalyqtar óńirdiń tarıhymen, mádenıetimen jáne negizgi jetistikterimen tanysa alady.
Keshe M. Gorkıı atyndaǵy memlekettik akademııalyq orys drama teatrynda S. Marshaktyń «Koshkın dom» atty balalarǵa arnalǵan ertegi men Sh. Aıtmatovtyń povesiniń jelisi boıynsha daıyndalǵan «Pegıı pec, begýşıı kraem morıa» qoıylymy kórsetildi.
Búgin, 24 qyrkúıekte saǵat 18.00 F. Býlıakovtyń «Vyhodılı babkı zamýj» atty komedııasy sahnalanady.
Sonymen qatar, saǵat 16.00 Beıbitshilik jáne kelisim saraıynda oblys ónerpazdarynyń «Uly dala ulysym» atty kontserttik baǵdarlamasy kópshilik nazaryna usynylady.
24 qyrkúıekte saǵat 18.00 «Jastar» teatrynda oblystyq qazaq drama teatrynyń M. Áýezovtyń povesiniń jelisi boıynsha N. Orazalınniń «Qıly zaman» tarıhı dramasy, al 25 qyrkúıekte saǵat 16:00 «Eńlik-Kebek» tragedııasy qoıylady.
Sondaı-aq, saǵat 10.00-18.00 aralyǵynda QR Ulttyq mýzeıinde Áýlıe ata jeriniń artefaktilerin, qolónershiler men kórkemsýret týyndylary kópshilik nazaryna usynylady, dep habarlaıdy astana.kz.
