Astanada Pavlodar oblysy murajaılarynyń qorlarynan uıymdastyrylǵan kórme ashylady

Kórme 2008 jyldan beri jemisti ótip kele jatqan «Alǵa umtylǵan Qazaqstan» atty aımaqaralyq kórme jobasy aıasynda ótkiziledi. Kórmege óńirdiń ǵasyrlar qoınaýynan syr shertetin tarıhı, arheologııalyq, sáýlet jáne beıneleý óneriniń úzdik jádigerleri qoıylady.

Ekspozıtsııalar úsh zalǵa ornalastyrylǵan. Úlken zalda Pavlodar óńiriniń qazirgi zamanǵy sýretshileriniń shyǵarmashylyq jumystaryn kórýge bolady. Olardyń arasynda: K.K. Baımýldın, A.I. Bıbın, A.V. Gýlın, A.E. Igembaev, Q.N. Qarjasov, P.G. Lysenko, A.O. Orazbaev, V.F. Polıkarpov, V.M. Prıhodko, O.A. Shýranov, E.A. Frıdlın jáne taǵy basqalar bar. Bul sheber sýrettelgen týyndylardyń negizine adamı tanym, fılosofııalyq tolǵanys taqyryptary, tabıǵattyń kórkem beınesi, portrettik janr, ulttyq bolmys beıneleri men nyshandary, tarıhı sıýjetter alynǵan.

Kishi zaldaG.N. Potanın atyndaǵy Pavlodar oblystyq tarıhı-ólketaný mýzeıi jáne Q.I. Sátpaev atyndaǵy mýzeıler qorynan ákelingen, óńirdiń ejelgi jáne qazirgi zamanǵy tarıhymen, áleýmettik-ekonomıkalyq jáne saıası jaǵdaıymen tanystyratyn fotomálimetter, muraǵattyq qujattar men eksponattar usynylǵan. Munda b.z.d. 65-70 mln. j.b. kezeńge jatatyn paleontologııalyq jáne arheologııalyq artefaktiler, úsh tuıaqty jylqy tektes gıpparıonnyń súıek qańqalary, úlken múıiz tumsyqtar men alpaýyt buǵylardyń múıizderi, muz dáýirine jatatyn mamonttyń tisteri taǵy basqa jádigerler qoıylǵan. Kelýshiler XIX ǵasyrdyń aıaǵy XX ǵasyrdyń basyndaǵy materıaldyq mádenı eskertkishter men halyq sheberleriniń zergerlik buıymdarymen tanysa alady.

Al túski as zalynda Pavlodar óńiri týmalarynyń: ǵalymdar, jazýshylar, aqyndar men qoǵam qaıratkerleriniń ómiri men qyzmeti jaıly baıandaıtyn ekspozıtsııa ornalasady. Osy óńirden shyqqan ataqty aqyn Buqar-jyraý, kompozıtor jáne aqyn J.M. Baıjanov, tarıhshy-aǵartýshy M.J. Kópeev, aqyn-demokrat S. Toraıǵyrov, aqyn jáne fılosof Jaıaý Musa, kınorejısser jáne akter - KSRO Halyq ártisi Sh. Aımanov, kompozıtor jáne jazýshy N.G. Shafer jáne t.b. uly tulǵalar muralary óshpes qazynaǵa aınalǵan.

Qazaqstan ǵalymdarynyń ishinde geolog, Qazaqstan Ǵylymdar Akademııasynyń birinishi Prezıdenti, KSRO Lenın jáne Memlekettik syılyqtardyń laýreaty Qanysh Imantaıuly Sátbaevtyń alatyn orny erekshe.

Sondaı-aq murajaıdyń aldyndaǵy alańda Pavlodar óńiriniń akterleri qonaqtarǵa arnap sahnalyq kórinister qoıady.