Astanada páterine shekten tys adam tirkegenderge 78,6 myń teńge aıyppul salynady

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Astanada páterine shekten tys turǵyn tirkegenderge qandaı jaza qoldanylatynyn aıtty.

 — Aıyppul bolady. Kólemi men merzimin áli pysyqtalyp jatyr. Ol úshin Ákimshilik kodekske arnaıy zań kerek, — dedi Serik Jumanǵarın.

Mınıstrdiń orynbasary Baýyrjan Omarbekov onyń jaýabyn tolyqtyrdy. 

— Ákimshilik quqyq buzý týraly kodeks boıynsha, qazir páterine shekten tys turǵyndardy tirkegen azamattarǵa 10 aılyq esepti kórsetkish (39 320 teńge) aıyppul kózdelgen. Usynylyp otyrǵan zań jobasynda osy somany eki ese kóterý, ıaǵnı 20 AEK (78 640 teńge) kóleminde jaýapkershilik júkteletini aıtylǵan, — dedi ol.

Sondaı-aq, ol osyndaı zańsyzdyqtarǵa jol bergen halyqqa qyzmet kórsetý ortalyqtarynyń mamandaryna qandaı jaza qoldanylatynyn túsindirdi.

— Olardyń jaýapkershiligi basqasha bolady. Mysaly, jalǵan qujat jasaý áreketteri anyqtalsa, qylmystyq jaýapkershilikke de tartylýy múmkin, — dedi vıtse-mınıstr.

Aıta ketý kerek, atalǵan zań jobasynda Astanada bir páterge tirkeletin turǵynnyń sany baspananyń sharshy metrine qaraı shekteý kózdelgen.