Astanada páterli bolǵan kópbalaly ana Elbasyna alǵys aıtty
ASTANA. QazAqparat - Elbasy Nursultan Nazarbaevtyń atyna Astana qalasynyń turǵyny Pirmenova Aıgúlden hat kelip tústi, dep habarlaıdy Aqordanyń baspasóz qyzmetinen.
Elorda turǵyny A.Pirmenova burynnan úsh balasy bar óz otbasynda úshemniń dúnıege kelýine baılanysty bıylǵy maýsym aıynda Memleket basshysynan baspana alýǵa kómektesýdi suraǵan bolatyn. Bul jolǵy hatynda ol ózine páter berilgenin aıtyp, qıyn kúnderde járdemdeskeni úshin Nursultan Nazarbaevqa alǵysyn joldaǵan. Osy oraıda ol ózine bul qoldaýdyń kúsh bergenin, erteńgi kúnge degen seniminiń nyǵaıa túskenin atap ótken. Sondaı-aq balalaryn Qazaqstannyń laıyqty azamattary etip tárbıeleýge bar kúsh-jigerin jumsaıtynyn jetkizgen.
