Astanada páterlerdi zańsyz jalǵa tapsyrý týraly 100-den asa habarlama tústi
ASTANA. QazAqparat - «Elordadaǵy qaýipsizdik pen jaılylyq» jobasyn iske asyrý sheńberinde Astana q. «Almaty» aýdany ІІB jergilikti polıtsııa qyzmeti páter ıeleri kooperatıvteriniń jumyskerlerimen birlesip páterlerdi zańsyz jalǵa berý faktilerin anyqtaýǵa baǵyttalǵan sharalardy kúndelikti negizde júrgizip keledi.
PIK jumyskerleri zańsyz turatyn azamattardy anyqtaǵan kezde birden ákimshilik ýchaskege bekitilgen ýchaskelik polıtsııa ınspektoryna habarlaıdy.
Jyl basynan beri PIK jumyskerlerinen polıtsııanyń ýchaskelik beketterine jáne ýchaskelik ınspektorlarǵa páterlerdi zańsyz jalǵa tapsyrý týraly 100-den asa habarlama túsken.
2017 jylǵy 15 naýryzdan 1 maýsymǵa deıingi aralyqqa josparlanǵan «Ýchaske» jedel aldyn alý sharasyn ótkizý barysynda «Almaty» aýdany ІІB JPQ ýchaskelik ınspektorlary PIK jumyskerlerimen birge páterlerdi aralaý kezinde aldyn ala málimetter boıynsha jalǵa tapsyrylǵan 60-tan asa páterdi anyqtaǵan.
Sondaı-aq, atalǵan sharalardy júrgizý barysynda polıtsııa qyzmetkerleri men PIK jumyskerleri jalǵa berýshilermen jáne jalǵa alýshylarmen túsindirý jumystaryn júrgizip, páterdi tapsyrý kezinde páter ıesi men jalǵa alýshynyń arasynda jazbasha kelisimge qol qoıyp, onda turatyn azamattardy jáne olardyń turý merzimi kórsetilý kerektigin aıtady. Kelisimniń kóshirmesin salyq organyna tapsyryp, páterdi jalǵa alǵan azamattardy ýaqytsha tirkeýge qoıý qajet.
Sondaı-aq, azamattarmen elorda turǵyndary men qonaqtary jasaıtyn quqyq buzýshylyqtardyń, qylmystardyń aldyn alýǵa baǵyttalǵan túsindirý jumysy júrgiziledi, dep habarlaıdy astana.kz.
