Astanada páterlerdi zańsyz jalǵa berýshiler anyqtaldy
ASTANA. QazAqparat - «Saryarqa» aýdany boıynsha memlekettik kirister basqarmasy men «Saryarqa» aýdany ІІB-nyń Jergilikti polıtsııa qyzmeti páterlerdi zańsyz jalǵa berý faktilerin anyqtaýǵa baǵyttalǵan reıdtik sharalardy júrgizýde, dep habarlaıdy elorda ákimdiginiń medıa ortalyǵy.
Tekserý sharalarynyń barysynda 24 qazanda Qarasaı batyr kóshesindegi turǵyn úılerdiń birinde páterdi zańsyz jalǵa berý faktisi anyqtalǵan bolatyn.
«Páter ıesi QR ÁQK-niń 463-baby boıynsha ákimshilik jaýapqa tartyldy. Oǵan 15 AEK mólsherinde aıyppul salyndy», - delingen memlekettik kirister basqarmasynyń habarlamasynda.
Jergilikti polıtsııa qyzmeti «Saryarqa» aýdanynyń turǵyndaryna úıdi jalǵa berý kezinde aıyppul sanktsııalaryna ilikpeý úshin memlekettik kirister organdarynda,Halyqqa qyzmet kórsetý ortalyqtarynda nemese QR elektrondy úkimeti (egov.kz ) arqyly jeke kásipker retinde tirkelý qajettigin eskertedi.
