Aqmola oblysynda taýar qunyn qymbattatqan 216 kásipker jaýapqa tartyldy
ASTANA. KAZINFORM – Aqmola oblysynda azyq-túlik naryǵyn turaqty tekserý barysynda áleýmettik mańyzy bar ónimderge ruqsat etilgen saýda ústemesin asyrý jáne tutynýshylar quqyǵyn buzý faktileri anyqtaldy.
Tekserý barysynda birqatar kásipkerlerdiń zań talaptaryn óreskel buzǵany belgili boldy. Atap aıtqanda, jeke kásipker ıÝldashev sábizdi 33,3 paıyz saýda ústemesimen satqan. Al «Gýlıaeva T.M.» JK-niń «Hýtorok» dúkeninde qaraqumyq jarmasy 27 paıyz ústememen, «Janalınova» JK ıeligindegi «Prodýkty» dúkeninde qyryqqabat 72,7 paıyz ústememen, «Mırmahmýd» pııazdy 60 paıyz ústememen saýdalaǵan.
Árbir derek boıynsha kásipkerler QR Ákimshilik quqyq buzýshylyq týraly kodeksiniń 204-4-babyna sáıkes ákimshilik jaýapkershilikke tartylyp, aıyppul salyndy. Bul sharalar ádiletsiz saýda tájirıbeleriniń aldyn alýǵa, naryqtaǵy ashyqtyqty qamtamasyz etýge jáne azamattardyń quqyqtaryn qorǵaýǵa baǵyttalǵan.
Sonymen qatar Shortandy aýdanyndaǵy dúkenderdiń birinde shujyq baǵasynyń shetel valıýtasy – rýblmen kórsetilgeni anyqtaldy. Qoldanystaǵy zańnamaǵa sáıkes, saýda sórelerindegi baǵa tek teńgemen belgilenýi tıis. Atalǵan quqyq buzýshylyq úshin de kásipker aıyppul arqalady.
2025 jyly Aqmola oblysynda jalpy 216 kásipker ákimshilik jaýapkershilikke tartylǵan. Onyń 99-yna eskertý berilse, 117 kásipkerge jalpy somasy 2,2 mln teńgeden astam aıyppul salynǵan. Anyqtalǵan zań buzýshylyqtar qatarynda áleýmettik mańyzy bar ónimderge saýda ústemesin asyrý, taýar baǵasyn shetel valıýtasymen kórsetý, tutynýshy buryshtarynyń bolmaýy jáne azamattardyń shaǵymdaryna ýaqtyly jaýap bermeý derekteri bar.
Sondaı-aq kúmán týdyrǵan 21 ónim satyp alynyp, tekserý júrgizilgen. Nátıjesinde 17 jaǵdaıda tańbalaý talaptarynyń buzylǵany anyqtalyp, kásipkerlerge 1 mln teńgeden astam aıyppul salyndy.
«Biz oblys boıynsha saýda núktelerin turaqty baqylaýda ustap, zańsyzdyqtyń aldyn alý jumystaryn jalǵastyramyz», – dedi Tutynýshylardyń quqyqtaryn qorǵaý komıtetiniń ókili Erlan Áýbákirov.
Aıta keteıik, Aqmola oblysynda naýqastar jóndeý jumystary aıaqtalmaǵan aýrýhanalarda em alýǵa májbúr.