Astanada páterden baǵaly zattar men aqsha urlaǵan eki azamat qamaýǵa alyndy
Astana qalasy PD qyzmetkerleri jańa jyl qarsańynda urlyqpen aınalysqan eki azamatty qolǵa túsirdi. Kazinform bul týraly Polisia.kz-ke silteme jasap habarlaıdy.
Elordalyq turǵyn mereke kúnderi belgisiz adamdardyń úıine kirip, seıften 1 000 eýro, 1 500 AQSh dollary, gaýhar tastary bar altyn buıymdar urlanǵanyn aıtyp, polıtsııaǵa shaǵymdanǵan.
Keltirilgen zalaldyń jalpy somasy shamamen 10 mln teńgeni qurady. Jedel-izdestirý is-sharalaryn ótkizý barysynda «Nura» aýdanynyń polıtsııa qyzmetkerleri 26 jáne 28 jastaǵy eki azamatty qolǵa túsirdi. Olardyń Elorda mańyndaǵy aýylda turatyny, esh jerde jumys istemeıtini belgili anyqtaldy. Kúdiktilerdiń buryn birneshe ret qylmystyq jaýapkershilikke tartylǵany da belgili boldy.
Eki sybaılas azamat astanalyq jábirlenýshiniń páterine plastıkalyq terezeni ashyp, toryn buzyp kirgen. Urylar páterdiń ıeleri joq ekenine aldyn ala kóz jetkizgen. Jaýap alý barysynda olardan zattaı aıǵaqtar alyndy. Kúdiktiler aqshanyń bir bóligin jańajyldyq merekeni atap ótýge jumsap úlgergen.
Qazirgi kezde aıypty dep tanylǵan azamattardyń basqa da qylmysqa qatysy bar-joǵy tekserilip jatyr.
