Astanada páter tonaǵan urylar qolǵa tústi
ASTANA. 3 qyrkúıek. QazAqparat - Astanada úsh kún ishinde birneshe páterdi tonaǵan eki pavlodarlyq ustaldy, dep habarlaıdy qalalyq ІІD-niń baspasóz qyzmetinen.
Polıtsııa qyzmetkerleri jedel-izdestirý sharalary barysynda elordada úsh kún ishinde 7 páterdi tonaǵan eki Pavlodar oblysynyń turǵynyn ustady. Tergeý kezinde olar Astanaǵa birneshe kúnge páter tonaý úshin kelgenin moıyndaǵan. Páter jaldap turyp, qala ishinde «Mıtsýbısı» kóligimen júrgen.
«Pavlodar oblysynyń turǵyndaryn ustaǵan kezde olardan aıǵaq retinde urlanǵan zattardyń bir bóligi - onyń ishinde zergerlik buıymdar, noýtbýk, fotoapparat, 750 myń teńge tárkilengen», - dep berilgen habarlamada.
Sonymen qatar polıtsııa qyzmetkerleri olardyń esirtki paıdalanatynyn ári buǵan deıin de páter urlyǵy boıynsha sottalǵandyqtaryn anyqtady.
«Olar kóbinese temirjol vokzaly mańyndaǵy úılerge magnıt kilti arqyly kirgen. Kez kelgen úıdiń qońyraýyn qaǵyp úıde eshkim joǵyn anyqtaǵan soń, esikke kilt keltirip ashyp urlyq jasap kelgen», - dep málimdedi Astana qalasynyń ІІD baspasóz qyzmetinen.
Atalǵan oqıǵa boıynsha QR QK-niń 175-babynyń 3-bóligimen qylmystyq is qozǵaldy. Ustalǵandar tergeý ızolıatoryna qamaldy.
