Astanada páter ıesi aqsha joǵalý faktisi boıynsha órt sóndirýshilerden keshirim surady
ASTANA. QazAqparat - Astanada páteri órtengen jyljymaıtyn múlik ıesi iri mólsherdegi aqsha joǵalý faktisi boıynsha órt sóndirýshilerden keshirim surady, dep habarlaıdy QazAqparat.
«Sonymen, qylmyskerler quryqtaldy. Olardyń eki adam ekeni anyqtaldy jáne kúdiktiler kinásin moıyndap otyr. Aqshanyń bir bóligin qaıtaryp berdi. Sonymen qatar aqshanyń birshamasyn depozıt pen kartalyq shotqa jiberip úlgergen. 1,2 mln teńgeni jumsaǵan, onyń ishinde 700 000 teńgesin býkmekerlerge utylǵan. Joǵalǵan aqshanyń qalǵan somasy túgel jınalǵannan keıin, maǵan tapsyrylady», - dep jazdy Facebook-tegi paraqshasynda páter ıesi A. Sultanov.
Munymen qosa ol qylmyskerlerdiń órt sóndirýshilerge esh qatysy joq ekenin atap ótti.
«Kúdiktiler páterdi qasaqana órtep, osy arqyly ózderiniń qylmystaryn jasyrǵysy kelgen. Aqshany urlap, páterge órt qoıǵan. Abyroı bolǵanda, olardyń bul áreketi iske aspaı qaldy. Dúısenbide keshqurym kúdiktiler anyqtalǵanyn jáne olardyń órt sóndirýshilerge qatysy joq ekenin bildim. Seısenbi kúni tańerteń Astana qalasy boıynsha TJD basshylyǵyna habarlasyp, oqıǵanyń mán-jaıyn túsindirip, ózimniń kúdigime baılanysty keshirim suradym. Osy oraıda jarııa túrde keshirim suraýmen qatar, páterimde órtti sóndirgen qyzmetkerlerdiń árqaısysynan keshirim suraıtynymdy aıttym», - dep jazdy ol.
Budan bólek tez arada qylmysqa kúdikti adamdardy ustaý boıynsha eleýli jumys atqarǵan polıtsııa qyzmetkerlerine de alǵysyn jetkizgen.
Esterińizge sala keteıik, Ashat Sultanov esimdi paıdalanýshy Feısbýkte Astanadaǵy páterinde órt bolǵany týraly habarlaǵan edi. Ol kezde páterde eshkim bolmaǵan.
Turǵynnyń aıtýynsha, úıinde áıeliniń mashınasyn satqan aqsha jáne taǵy bir dúken ashý úshin jınaǵan aqsha - 15 mıllıon teńge jáne 8 myń dollar bolǵan.
Óz kezeginde TJ jónindegi komıtet tarapy bul jaǵdaıǵa túsinikteme berdi.
«Oqıǵa ornynda aqsha joǵaldy degen habar kelgen soń Órt sóndirý qyzmetiniń basshylyǵy men polıtsııa qyzmetkerleri sonda bardy. Túsiniktemeler alyndy. Tekserý júrip jatyr», - dep habarlady Tótenshe jaǵdaılar komıtetiniń ókilderi.
