Astanada páter alaıaqtyǵymen aınalysqan áıel ustaldy
ASTANA. 24 qyrkúıek. QazAqparat - Polıtseıler klıentterge páterlerin jóndep, dızaınerlik jıhazben jabdyqtap berem dep óz qyzmetin usynǵan alaıaq áıeldi ustady. Bul týraly Astana qalasy ІІD baspasóz qyzmetinen habarlady.
Astanalyq ІІD qyzmetkerleri alaıaqtyq jasady degen aıyp boıynsha jedel-izdestirý sharalaryn júrgizý barysynda 1975 jyly týǵan Qaraǵandy oblysynyń turǵynyn quryqtady.
20 qyrkúıekte Astana qalasynyń turǵyny áıel adam ony aldap iri kólemdegi aqsha qarajatyn qoldy qylǵany týraly aryzben polıtsııaǵa habarlasqan.
Tergeý barysynda anyqtalǵandaı, kúdikti áıel azamattardyń senimine kirip, Qaraǵandyda jıhaz jasaıtyn tsehtyń dırektory retinde tanysqan. Páterge «tolyǵymen» jóndeý jumysyn júrgizýdi jáne dızaınerlik jıhazben jaqsylap jabdyqtaýdy usynyp, iri aqsha somasy túrinde qalalyqtardan aldyn ala tólem alǵan.
Óziniń Astana qalasynyń aýmaǵynda ǵana jasaǵan qyzmetiniń nátıjesinde, áıel adam osyndaı aıla-sharǵymen 8 azamatqa qııanat jasaǵan. Ol óz is-áreketimen ańqaý páter ıelerine birneshe mıllıon teńge somasynda zalal keltirgeni belgili boldy. Polıtsııanyń uıǵarymy boıynsha, áli de aryzdar túsýi múmkin, sondyqtan atalǵan soma da ulǵaıýy yqtımal.
Ustalǵan áıelge qatysty QR QK 177-baby boıynsha qylmystyq is qozǵaldy.
