Astanada Parlament palatalarynyń birlesken otyrysy bastaldy
ASTANA. KAZINFORM — Búgin elordada Parlament palatalarynyń birlesken otyrysy ótip jatyr.
Kún tártibine sáıkes, segizinshi saılanǵan Parlamenttiń ekinshi sessııasyna qorytyndy jasalady.
Palata otyrysyna depýtattyq korpýstan bólek, QR Premer-Mınıstri bastaǵan Úkimet músheleri qatysyp jatyr. Sonymen qatar, QR Konstıtýtsııalyq soty men QR Joǵarǵy sotynyń tóraǵalary, QR Ulttyq bankiniń tóraǵasy, QR Ortalyq saılaý komıssııasynyń tóraǵasy bar.
Eske salsaq, osy aptada Májilis tóraǵasy Erlan Qoshanov 28 maýsymda parlamenttik sessııa jumysynyń qorytyndysy jasalatynyn aıtty.
«Búgin biz Májilistiń ekinshi sessııadaǵy jumysyn aıaqtaǵaly otyrmyz. Jalpy, parlamenttik sessııa jumysyn juma kúni Parlament Palatalarynyń birlesken otyrysynda qorytyndylaımyz. Qazir endi Májilis jumysynyń keıbir nátıjelerine qysqasha toqtalyp óteıin. Ótken sessııa mazmundy ári nátıjeli boldy. Prezıdenttiń aýqymdy reformalar baǵytyn zańnamalyq turǵydan qamtamasyz etý boıynsha baıypty da qajyrly is atqaryldy. Osy sessııada biz 39 jalpy otyrys ótkizip, 302 máseleni qaradyq», — dedi palata tóraǵasy.
