Astanada parkınson dertimen aýyratyn naýqastarǵa keńes beretin mektep ashyldy

ASTANA. QazAqparat – QR Prezıdentiniń Іs Basqarmasy Medıtsınalyq ortalyǵynyń aýrýhanasynda parkınson dertine shaldyqqan patsıentterge arnalǵan mektep uıymdastyryldy, dep habarlaıdy QazAqparat tilshisi.

Arnaıy jasaqtalǵan mektep jumysy barysynda naýqastarǵa parkınson aýrýyn emdeý jáne ońaltý joldary, ómir salty, tamaqtaný, dıetany uıymdastyrý máseleleri týraly aqparat beriledi.

«Parkınson mektebi patsıentterimizdiń ótinishi boıynsha uıymdastyryldy. Bizdiń mindetimiz – patsıentter men otbasy múshelerin emniń qyr-syrymen tanystyrý. Mamandar olarǵa dári-dármekterdiń áseri týraly, olardy qabyldaý erekshelikteri týraly aqparat bere otyryp, salaýatty ómir salty negizderine, asqyný, órshýdiń aldyn alýǵa úıretedi», - dedi QR PІB Medıtsınalyq ortalyǵy aýrýhanasynyń nevrology Raýshan Taýtanova.

Atalǵan medıtsınalyq ortalyqtyń mamandary jyl saıyn 100-ge jýyq adamǵa qozǵalys buzylystary boıynsha konsýltatsııa berip, em-dom kórsetedi. Olardyń kópshiligi dertine ota arqyly daýa tabady. Uıymdastyrýshylar dereginshe, parkınson mektebiniń jumysy turaqty is-sharaǵa aınalmaq.