Astanada «Parıjdik bogema» operasynyń premerasy ótedi
NUR-SULTAN. QazAqparat - Djakomo Pýchchınıdiń eń ataqty operalarynyń biri - «Bogema» - 19 jáne 20 sáýir kúnderi «Astana Opera» sahnasynda qoıylady. Qazaqstandyq-ıtalııalyq qoıylym toby spektakldiń naǵyz sensatsııa bolatynyna ýáde berýde, dep habarlaıdy QazAqparat.
«Astana Opera» teatrynyń baspasóz qyzmetinen málim etkendeı, premera Jastar jyly aıasynda QR Mádenıet jáne sport mınıstrliginiń qoldaýymen ótedi.
Afıshada tek áıgili esimder usynylǵan: qoıýshy dırıjer - Djýzeppe Akýavıva, qoıýshy rejısser - Andrea Bernard, qoıýshy stsenograf - Etsıo Frıdjerıo, kostıýmder boıynsha sýretshi - «Oskar» syılyǵynyń ıegeri Franka Skýarchapıno, proektsııalar boıynsha dızaıner - Serdjıo Metallı, bas hormeıster - Qazaqstannyń eńbek sińirgen qaıratkeri Erjan Dáýitov.
Operanyń sıýjetin kompozıtor tanymal frantsýz jazýshysy Anrı Mıýrjeniń «Bogema ómirinen kórinister» shyǵarmasynan alǵan. «Bogemanyń» mýzykasyn Dj.Pýchchını segiz aıdyń ishinde jazǵan. Premerasy 1896 jyldyń 1 aqpanynda Týrınde 28 jastaǵy Artýro Toskanınıdiń dırıjerlik etýimen ótti. Keıin «Bogema» barsha álem sahnalaryn jaýlap aldy.
«Bogema» - lırıkalyq opera, teatrlarda jıi oryndalatyn týyndylardyń biri. Osynaý spektaklge men bar yntamdy saldym. Teatrymyz úshin sátti joba bolady degen senimdemin», - dedi qazirgi zamannyń ataqty stsenografy Etsıo Frıdjerıo (Italııa).
Kórermen nazaryna operanyń jańa sahnalyq redaktsııasy usynylady. Sońǵy ozyq ári zamanaýı teatrlyq tehnologııalardyń arqasynda operany sahnanyń tehnıkalyq múmkindikterine beıimdep, qoıylym tobynyń eń batyl sheshimderi júzege asyrylmaq.
«Men «Bogema» spektaklin alǵash ret qoıamyn jáne bul Dj.Pýchchınıdiń týyndylaryn sahnalaýdaǵy tyrnaqaldy jumysym. Sondyqtan osy tamasha operany ózimniń jeke túsinigim arqyly iske asyrýǵa tyrysatyn bolamyn. Mýzykany tyńdap, lıbrettony oqyǵan kezimde oıyma ıdeıalar keledi. Keıipkerlerdiń minez-qulqyn sahnada jaqsyraq kórsetý úshin árdaıym olardyń psıhologııasyn túsinýge tyrysamyn. Kórermenderdi qyzyqtyra alatyn poetıkalyq beıneler men oqıǵalar jasaýǵa tyrysyp baǵamyn», - dep bólisti qoıýshy rejısser Andrea Bernard.
Premera «Astana Opera» jetekshi solısteriniń, elordalyq teatrdyń Sımfonııalyq orkestri jáne horynyń qatysýymen ótedi.
