Astanada «Parıj Qudaı Ana sobory» baletiniń kórsetilimi bastaldy
ASTANA. KAZINFORM - «Astana Opera» teatrynda frantsýz horeografy Rolan Petıdiń «Parıj Qudaı Ana sobory» baletiniń kórsetilimderi bastaldy. «Operalııa» halyqaralyq mýzykalyq festıvaliniń baǵdarlamasyna engen bul spektakl 19-21 maýsym aralyǵynda ótedi.
Vıktor Gıýgonyń ataqty romanynyń jelisimen qoıylǵan týyndy teatrdyń jetekshi solısteri men jas ártisterdiń basyn sahnada qaıta qosty. Teatr ákimshiligi atap ótkendeı, balet trýppasynyń kórkemdik jetekshisi Altynaı Asylmuratova jańa býyn oryndaýshylaryn HH ǵasyrdyń eń kúrdeli baletterin oryndaýda qoldap keledi.
Búgin, 19 maýsymda, Klod Frollo partııasynda Islam Qaıypbaı alǵash ret óner kórsetedi. Ártis borysh, ıman men qushtarlyq arasyndaǵy ishki qaıshylyqtardan jany kúızelgen arhıdıakon rólin alǵash ret oryndady. Esmeralda beınesin Qazaqstannyń eńbek sińirgen qaıratkeri Mádına Ónerbaeva somdaıdy, Kvazımodony Serik Naqysbekov, al Feb partııasyn Qazaqstannyń eńbek sińirgen qaıratkeri Erkin Rahmatýllaev oryndaıdy.
- Frollo partııasyna daıyndyq - bul, eń aldymen, keıipker beınesimen tereń jumys isteý degen sóz. Men úshin keıipkerdiń ishki arpalysyn plastıka, qozǵalys dramatýrgııasy jáne akterlik sheberlik arqyly kórsetý mańyzdy. Kórermen ony tek jaýyz keıipker emes, ishki jan dúnıesi bar tiri adam retinde kórgenin qalaımyn, - dep atap ótti Islam Qaıypbaı.
20 maýsymda Feb rólinde alǵash ret Ámir Hvan óner kórsetedi. Sonymen qatar bul kúni sahnaǵa Shuǵyla Ádephan, Ǵalymjan Nurmuhamet jáne Aıbar Toqtar shyǵady.
Kórsetilimder serııasy 21 maýsymda Qazaqstannyń eńbek sińirgen qaıratkeri Baqtııar Adamjan Kvazımodo partııasyn oryndaıtyn spektaklmen aıaqtalady.
Sondaı-aq osy keshte Qazaqstannyń eńbek sińirgen qaıratkeri Áıgerim Beketaeva (Esmeralda), Arman Orazov (Frollo) jáne Dıas Qurmanǵazy (Feb) óner kórsetedi.
«Parıj Qudaı-Ana sobory» baletin Rolan Petı 1965 jyly Parıj operasy úshin shyǵarǵan bolatyn. Qoıylymnyń mýzykasyn Morıs Jarr jazsa, stsenografııasyn Rene Allıo jasap, kostıýmderin ańyzǵa aınalǵan kýtıýre Iv Sen-Loran daıyndaǵan.
Spektakl «Astana Opera» repertýarynda 2016 jyldan beri júrip keledi jáne teatrdyń eń tanymal baletteriniń biri bolyp qala beredi.
Aıta keteıik, buǵan deıin, Qazaqstanda teatrlarǵa degen qyzyǵýshylyqtyń artyp kele jatqany belgili bolǵan edi.
