Astanada parasportshylardyń qurmetine kórme ashyldy
ASTANA. KAZINFORM — Frantsııanyń ulttyq merekesine oraı jáne Parıjde ótetin Olımpıada oıyndarynyń ashylý qarsańynda Frantsııanyń Qazaqstandaǵy Elshiligi, QR Ulttyq paralımpıada komıteti, qala ákimdigi jáne múmkindigi shekteýli adamdarǵa arnalǵan sporttyq daıyndyq ortalyǵy «Astana — Parıj 2024: Fokýsta gandısport jáne Paralımpıada oıyndary» fotokórmesin ashty.
Kórmege 50-ge jýyq fotografııalyq jumys qoıylǵan. Onda parasporttyń júldegerleri beınelengen.
Onyń keıbireýi 28 tamyz ben 8 qyrkúıek aralyǵynda Parıjdegi Paralımpıada oıyndarynda el namysyn qorǵaıtynyn atap ótken jón.
«Ókinishke qaraı, paralımpıadalyq sportshylar jıi kóleńkede qalady. Kórme arqyly paralımpıadashylarǵa qurmet kórsetkimiz keldi. Bıyl Frantsııada 4,5 myńǵa jýyq paralımpıadashy sporttyń 22 túrinen baq synaıdy», — dedi Frantsııa elshisi Dıde Kaness.
Sondaı-aq, kórmede iri halyqaralyq jarystar kezinde túsirilgen 20 fotosýret qoıylǵan.
Onda ártúrli paralımpıadalyq sport túrlerinen synǵa túsip jatqan frantsýz jáne qazaqstandyq sportshylar beınelengen.
Arnaıy ázirlengen ınklıýzıvti kórme Atyraý kópirine kire beriste aqparattyq stendte ornalastyrylǵan.
QR kod arqyly qazaq jáne orys tilderinde tıflokommentatsııa formatynda da qoljetimdi.
«Búginde Qazaqstan qorjynynda Frantsııadaǵy jazǵy Paralımpıada oıyndaryna sporttyń 8 túri boıynsha 21 lıtsenzııa bar. Áli de joldama alýǵa bolady. Aıta ketý kerek, dúbirli dodaǵa keıbir sport túrlerinen tuńǵysh ret qatysamyz», — dedi sport jáne dene shynyqtyrý isteri komıtetiniń múmkindigi shekteýli adamdarmen jumys jónindegi basqarmasynyń basshysy Marat Qaskerbaev.
Onyń aıtýynsha, elimizde 57 myń múmkindigi shekteýli adam sportpen jáne dene shynyqtyrýmen aınalysady.
Aıta keteıik, kórme 14 tamyzǵa deıin jalǵasady.
