Astanada paralımpıadashylarǵa «Qaısar tulǵa» syılyǵy tapsyryldy
ASTANA. 17 sáýir. QazAqparat - Búgin Astanadaǵy Beıbitshilik jáne kelisim saraıynda «Teń múmkindikter sporty» ulttyq jobasy aıasynda tuńǵysh ret «Qaısar tulǵa» syılyǵyn tapsyrý saltanaty ótti.
Uıymdastyrýshylardyń atap ótýinshe, qazaqstandyq paralımpıadalyq qozǵalysynyń tarıhynda alǵash ret múmkindigi shekteýli sportshylardyń qatysýymen mundaı shara ótip otyr. Onda múgedekter sportyndaǵy úzdik jattyqtyrýshylar men sportshylar, metsenattar jáne oblystyq (qalalyq) klýbtar, mektepter men bólimder marapattaldy.
Jyl saıyn jalpy alǵanda múgedekter arasyndaǵy sport túrlerinen 40-tan asa el chempıonattary ótkiziledi. 2003 jyly qurylǵan Qazaqstannyń ulttyq paralımpıadalyq komıteti elimizdegi sporttyq uıymdardyń úılestirýshi organy bolyp qana qoımaı, halyqaralyq arenada qazaqstandyq múgedek sportshylardyń múddesin qorǵap keledi.
Búginde elimizde 2500-den astam adamdy qamtıtyn múgedekterge arnalǵan 6 sport klýby, 2 múgedekter mektebi jáne basqa da sporttyq bólimsheler bar.
Esterińizde bolsa, Londonda ótken 2012 jylǵy HІÚ jazǵy Paralımpıadalyq oıyndarda Qazaqstan lıtsenzııa alýda rekord jasap, dúbirli dodaǵa elimizden 7 paralımpııashy qatysqan bolatyn.
Qazirgi ýaqytta kezekti 2014 jyly Sochıde ótetin qysqy paralımpııalyq oıyndarǵa daıyndyq jumystary qyzý júrgizilýde.
Taǵy bir aıta keterligi, keshe ǵana QR Ulttyq paralımpııalyq komıteti men «Samuryq-Qazyna» Ulttyq ál-aýqat qory» AQ arasynda elimizde múgedekter sportyn damytý salasynda ózara tıimdi yntymaqtastyq týraly memorandýmǵa qol qoıylǵan bolatyn.
Atalǵan shara osyndaı aıtýly oqıǵalarmen baılynysty uıymdastyrylyp otyr.
