Astanada para hokkeıden álem chempıonaty bastaldy

ASTANA. KAZINFORM – Búgin elordada para hokkeıden (B-pýl) álem chempıonaty bastaldy. 

Jarysqa Italııa, Japonııa, Shvetsııa, Qazaqstan, Frantsııa jáne Fınlıandııa quramalary qatysady.

Sporttyq sharanyń ashylý saltanatynda QR Týrızm jáne sport vıtse-mınıstri Serik Jarasbaev pen Halyqaralyq para hokkeı federatsııasynyń tehnıkalyq delegattar basshysy Pıter Andersson quttyqtaý sóz sóıledi.

Vıtse-mınıstr álem birinshiliginiń elimizde ekinshi ret ótip jatqanyn eske salyp, Qazaqstannyń qysqy para Olımpıada oıyndaryna joldama alýǵa jaqsy múmkindigi bar ekenin aıtty.

– Memleket tarapynan elimizde múmkindigi shekteýli tulǵalardyń dene shynyqtyrýmen jáne sportpen shuǵyldanýy úshin barlyq jaǵdaı jasalyp jatyr. 2024 jyldan bastap para hokkeıden ulttyq shtattyq qurama komandasy quryldy. Sonyń nátıjesinde osy sanattaǵy azamattardyń sportpen aınalysý úlesi jyl saıyn artyp keledi, - dedi Serik Maratuly óz sózinde.

Aıta keterligi, Qazaqstan quramasy búgin 19:00-de alǵashqy oıynyn Shvetsarııaǵa qarsy ótkizedi.

Osyǵan deıin habarlaǵanymyzdaı, elordada týrnır aınalmaly júıe formatynda ótedi. Jarystyń qorytyndsy boıynsha alǵashqy eki oryndy ıelengen komandalar A tobyna ótse, sońǵy oryn alǵan qurama C tobyna túsedi.

Sondaı-aq Astanada ótetin bul birinshilikte Mılan — 2026 XIV qysqy Paralımpıada oıyndaryna irikteý týrnırine beriletin eki joldama sarapqa salynady. Іrikteý jarysy 2025 jyldyń 5-10 qarashasy aralyǵynda Norvegııanyń Iessheım qalasynda ótedi. Bul sporttyq básekede Paralımpıadaǵa tikeleı joldama alatyn quramalar anyqtalady.