Astanada para dzıýdodan Azııa chempıonaty ótedi

Qazaqstan para dzıýdo federatsııasynyń baspasóz qyzmetinen málim etkenindeı, qurlyqtyq birinshilikke Azııanyń 11 elinen 80-nen astam tatamı sheberi qatysady.

Atalǵan jarysta Qazaqstan ulttyq quramasynan J1 jáne J2 sanaty boıynsha 22 dzıýdoshy baq synaıdy.

Para dzıýdodan Qazaqstan quramasynyń bas bapkeri Jandos Qııanovtyń aıtýynsha, Azııa chempıonatyna daıyndyq tyńǵylyqty júrip jatyr. Qazirgi tańda qurama Almatyda jarys aldyndaǵy sońǵy qorytyndy jattyǵý jıynynda sheberlikterin shyńdaýǵa kirisken. Azııa chempıonatyna qatysatyn sportshylar qatarynda tájirıbeli balýandar da, jas sportshylar da bar.

«Bıyl Shymkentte ótken Qazaqstan kýbogynda jańa esimder iriktelip, qurama jasaqtaldy. J1 sanatyndaǵy, kózi múldem kórmeıtinder qataryndaǵy balýandar úshin bul álemdik dárejedegi alǵashqy birinshilik bolaıyn dep tur. Qurlyqtyq báseke óz elimizde ótetin bolǵandyqtan, jaýapkershilik óte joǵary. Sportshylarymyzdyń fızıkalyq, psıhologııalyq turǵydan jaǵdaılary jaqsy. Elordamyzda ótetin jarysta quramadaǵy árbir sportshy nátıjeli kúres kórsetedi, el namysyn abyroımen qorǵaıdy dep senemin», - dedi J. Qııanov.

Aıta keterligi, Azııa chempıonaty Astana qalasyndaǵy Jaqsylyq Úshkempirov atyndaǵy jekpe-jek saraıynda ótedi.

Para dzıýdodan Azııa chempıonatyna qatysatyn Qazaqstan ulttyq quramasynyń tizimi mynadaı:

Áıelder

J2 -48 kg: Aqmaral Naýatbek

J1 -57 kg: Alfııa Tilekqabyl, Dılorom Dıhanova

J2 -57 kg: Daıana Fedosova

J1 -70 kg: Dınara Kýdjýlova

J2 -70 kg: Dıana Bólekova

J1 +70 kg: Záýre Aıtek.

Erler

J1 -60 kg: Murat Madınov, Temirbolat Tashekenov

J2 -60 kg: Ánýar Sarıev

J1 -73 kg: Erǵalı Shameı, Asylan Nurdaýletov

J2 -73 kg: Oljas Orazalyluly, Azamat Nokýshev

J1 -90 kg: Abylaı Ádilbekov, Baýyrjan Arystanbekov

J2 -90 kg: Janbota Amanjol, Ǵalymjan Smaǵululy

J1 +90 kg: Erlan Ótepov, Baǵlan Ońalbek

J2 +90 kg: Erlan Konkıev, Talǵat Ájiǵalıev.

Eske sala keteıik, budan buryn dzıýdodan álem chempıonatyna qatysatyn Qazaqstan quramasy anyqtalǵanyn jazǵan edik.