Astanada para dzıýdodan álem chempıonatynyń ashylý saltanaty ótti
ASTANA. KAZINFORM – Astanadaǵy Jaqsylyq Úshkempirov atyndaǵy jekpe-jek saraıynda para dzıýdodan álem chempıonatynyń saltanatty ashylý rásimi ótti.
Mınıstrliktiń málimetinshe, is-sharaǵa Týrızm jáne sport mınıstri Erbol Myrzabosynov, Halyqaralyq zaǵıptar sport federatsııasynyń (IBSA) prezıdenti Ilgar Ragımov, IBSA dzıýdo komıtetiniń tóraǵasy ıAnosh Tardosh, sondaı-aq dıplomatııalyq mıssııa ókilderi, halyqaralyq sport uıymdary, ulttyq federatsııalar men seriktester qatysty.
Erbol Myrzabosynov jarystyń resmı ashylýynda quttyqtaý sóz sóılep, álem birinshiligine qatysyp jatqan sportshylarǵa sáttilik tiledi.
– Qazaqstanda paralımpıadalyq qozǵalys qarqyndy damyp keledi jáne bul qoǵamda ınklıýzıvti qundylyqtardy qalyptastyrýda mańyzdy ról atqarady. Sonyń ishinde para dzıýdo sportynan otandastarymyz halyqaralyq jarystarda nátıjeli óner kórsetip júr. Tokıoda ótken Paralımpıadada otandastarymyz úsh kúmis medal ıelense, Parıjde bir altyn, bir kúmis jáne úsh qola medal jeńip aldy. Quramamyzdyń sapynda álem jáne Azııa chempıondary bar. Astanada álem chempıonatynyń ótýi – elimizdiń halyqaralyq deńgeıde sporttyq is-sharalardy joǵary deńgeıde ótkize alatyndyǵynyń aıqyn dáleli. Bul chempıonatta da sportshylarymyz elimizdiń namysyn abyroımen qorǵaıdy dep senemin, – dep atap ótti Týrızm jáne sport mınıstri.
IBSA prezıdenti Ilgar Ragımov ta chempıonat qatysýshylaryna jyly lebizin bildirip, Qazaqstanǵa kelý ózi úshin úlken mártebe ekenin, elimizden árdaıym shynaıy qonaqjaılyq pen dzıýdoǵa degen adaldyqty sezinetinin atap ótti.
– Qazaqstanmen alty jyldan astam ýaqyt boıy yntymaqtasa jumys istep kelemiz. Alǵashqy eki halyqaralyq týrnır Atyraýda ótse, keıin Astanada Grand Prix kezeńi men Azııa chempıonaty uıymdastyryldy. Osy tájirıbeden keıin biz Qazaqstan álem chempıonatyn ótkizýge tolyq daıyn degen ortaq sheshimge keldik. Chempıonatqa daıyndyq bir jyl buryn bastaldy jáne bul úderis Halyqaralyq dzıýdo federatsııasymen tyǵyz baılanysta júzege asty, – dedi Ilgar Ragımov.
Aıta keteıik, para dzıýdodan álem chempıonaty 13-15 mamyr kúnderi ótedi.
Bıylǵy dodaǵa 38 elden 300-den astam sportshy qatysyp jatyr. Jarysta 20 medal jıyntyǵy sarapqa salynady. Onyń 16-sy Paralımpıada baǵdarlamasyna ense, qalǵan tórteýi jańadan qosylǵan salmaqtar boıynsha úlestiriledi.
Bul – 2028 jylǵy Los-Andjeles Paralımpıadasyna irikteý týrnıri mártebesine ıe bedeldi jarys.
Aıta keteıik, búgin, 13 mamyr kúni Astanada dzıýdodan «2025 IBSA Judo World Championships Astana» jarysynda el quramasynan 9 sportshy júldege talasady.