Astanada «Panfılovshylar: ańyzǵa aınalǵan erliktiń 60 kúni» atty kitaptyń tusaýy kesildi
Kitap tarıh fakýltetiniń Ǵylymı Keńesiniń májilisinde talqylanyp, ál-Farabı atyndaǵy QazUÝ ǴÁK tarapynan basýǵa usynyldy. Taralymy 500 dana kitap Almaty qalasy ishki saıasat basqarmasynyń járdemimen Memlekettik áleýmettik tapsyrys aýqymynda, professorlar - V.Grıgorev pen L.Ahmetovanyń avtorlyqtarymen ázirlendi.
«Sońǵy kezdegi oqıǵalar kórsetip otyrǵanyndaı, aqparattyq soǵystar álemdik saıasattyń mańyzdy elementine aınalýda. Olar kóp rette tarıhı qujattamalarǵa qatysty. Uly Otan soǵysy jaýyngerleriniń tikeleı urpaqtary bolyp tabylatyn avtorlar úshin qaharman babalar qarsylastarynyń shabýyldaryn óz tarıhı alańynda qorǵap qalý ar-namys paryzyna aınalyp otyr. Kitapta sol bir kezeńniń búgingi nemereleri men shóberelerine qaharly 1941-diń qıyn-qystaý kúnderindegi bizdiń jerlesterimizdiń is-qımyly týraly áńgimeleýge tyrystyq», - deıdi kitap avtory, professor Láılá Ahmetova.
V.Grıgorev pen L.Ahmetova Uly Otan soǵysynyń eń kúrdeli kezeńine baılanysty birqatar oqıǵalardy tarıhı taldaý turǵysynan alǵanda ótken ýaqyttyń belgisiz tustaryn tolyqtyrýǵa talpynys jasaǵan.
Oqýlyq-praktıkalyq basylymda I.V. Panfılov atyndaǵy 316 atqyshtar-8 gvardııalyq dıvızııanyń qııan-keski urystary men erlikteri, ómiri men turmysy kún sanap kórsetilgen. Sondaı-aq Rokossovskııdiń 16 armııasyna, panfılovshylarǵa qarsy turǵan nemis jaǵynyń da 60 kún boıǵy kúndelikti estelikteri men qujattary berilgen.
Kitap stýdentterge, jastarǵa, saıasatkerlerge, pedagogtarǵa, HH ǵasyrdyń tarıhy men aqıqatyna qyzyǵatyn jurttyń barlyǵyna arnalǵan.