Astanada P.I. Chaıkovskııdiń 175 jyldyǵyna arnalǵan kontsert ótedi
ASTANA. QazAqparat - Kúlli mýzyka álemi aǵymdaǵy jyly uly kompozıtor P.I. Chaıkovskııdiń 175 jyldyǵyn atap ótýde. Osyǵan oraı 7 maýsymda «Astana Opera» teatrynyń Úlken zalynda «Máńgi qundylyqtar jasaýshy» atty kontsert ótedi. Bul týraly atalǵan óner ordasynyń baspasóz qyzmeti habarlady.
P.I. Chaıkovskııdi dúnıe júzinde týyndylary eń kóp oryndalatyn klassık dep ataıdy. Ol - 80-nen astam shyǵarmanyń avtory, onyń ishinde on opera jáne úsh balet bar. Áıgili kompozıtordyń mýzykasyn álemniń barlyq orkestrlary oryndaıdy, al onyń sımfonııalary jer betindegi úzdik kontserttik zaldardyń repertýaryn kórkeıtedi. Barlyq jas pıanınoshylar onyń balalarǵa arnalǵan pesalaryn oryndaýmen ósip keledi. Onyń jaryqqa ákelgen romanstaryn túrli ulttyń ánshileri oryndaıdy. Petr Ilıauly óz zamanyndaǵy janrlardyń barlyǵyn qamtyp, solardyń árqaısysynda tóltýma dúnıege ákelgen.
«Astana Opera» teatry bul mańyzdy datany nazardan tys qaldyrǵan joq. Mýzyka ǵumyryndaǵy aıryqsha oqıǵany óner ordasy orasan zor kontsertpen atap ótedi. Birinshi bólimde kompozıtordyń eń tanymal operalarynan arııalar, dýetter men úzindiler shyrqalady, olar - «Evgenıı Onegın», «Qarǵanyń mátkesi», «Iolanta», t.b. Oryndaıtyn solıstter: Barseg Týmanıan, Dına Hamzına, Aıgúl Nııazova, Súndet Baıǵojın, Talǵat Musabaev, Baıǵalı Mombekov, Jan Tápın, Jámılıa Jarqymbaeva, Bıbigúl Januzaq, Talǵat Ǵaleev, Beıimbet Tańaryqov, Saltanat Muratbekova, Gúljanat Sapaqova, Tatıana Vıtsınskaıa, Elena Ganja, Narul Toıkenov, Bolat Esimhanov, Eskendir Ábjanov. Sonymen qatar birinshi bólimde elordalyq teatr horynyń solıstteri óner kórsetedi.
- Kózi tirisinde P.I. Chaıkovskıı mýzykam keń taralsa, halyq odan janyna jubanysh, kóńiline medeý tapsa eken dep armandaıtyn. Onyń armany oryndaldy dep oılaımyn, nege deseńiz, onyń mýzykasy adamǵa dál sol demeý sezimin, sondaı-aq senim men úmit beredi. Biz barlyq tyńdarmandy mýzyka óneriniń eń úzdik jaýharlarynan lázzat alýǵa kontsertimizge shaqyramyz, - dep atap ótti mýzykatanýshy Marjan Jákenova.
Uly kompozıtor 1891 jyly Karnegı Holdy (Carnegie Hall) ashqan dırıjerlardyń biri bolǵanyn aıta keteıik.
Ekinshi bólimde teatr orkestri sımfonııalyq mýzykanyń úzdigi - № 6 sımfonııasyn oryndaıdy. Bul kompozıtordyń «eń jaqsysy ári eń shynaıy týyndy» dep ataǵan sońǵy sımfonııasy. Onyń tusaýyn keskende avtor ózi dırıjerlik etken. Sodan toǵyz kúnnen keıin P.I. Chaıkovskıı ómirden ozǵan. Kelesi joly sımfonııa kompozıtordyń ózine arnalǵan kontsertte oryndalyp, orasan zor tabysqa jetti de, sodan beri dúnıe júzi boıynsha saltanat quryp keledi.
