Astanada ózin polıtsııa qyzmetkeri retinde tanystyrǵan alaıaq sottaldy

ASTANA. KAZINFORM – Qala turǵyny ózin polıtsııa qyzmetkeri retinde tanystyryp, júrgizýshi kýáligin alýǵa jáne avtokólikti qaıta rásimdeýge járdem beremin dep alaıaqtyq jolmen tanystaryn jáne jábirlenýshilerdi aldaǵan.

Ol jábirlenýshilerden 1 mln teńgeden astam qarajat alyp, óz mindettemelerin oryndamaǵan jáne aqshany óz qalaýynsha jumsaǵan.

Memlekettik aıyptaýshy sotqa sottalýshynyń birneshe ret aýyr sanattaǵy qylmystyq quqyq buzýshylyq jasaǵanyn dáleldeıtin aıǵaq usyndy. Kinásin tolyq moıyndaýyn jáne zalaldy óteýin eskere otyryp, sot úkimimen oǵan 3 jylǵa bas bostandyǵyn shekteý jazasy taǵaıyndalyp, probatsııalyq baqylaý belgilendi.

Úkim zańdy kúshine endi.

Qala prokýratýrasy bótenniń múlkin jymqyrý nemese aldaý nemese senimdi teris paıdalaný jolymen bóten múlikke quqyqty ıemdengeni úshin múlki tárkilenip, 10 jylǵa deıin bas bostandyǵynan aıyrý jazasy kózdelgenin eske saldy.

Buǵan deıin Almaty qalasynyń polıtsııa departamenti ınternet-alaıaqtyqtyń jańa túri týraly aıtyp berdi.

Qostanaıda telefon nómirlerin jalǵa berip, alaıaqtarǵa kómektesken jigit ustaldy.