Astanada ózin óltirmek bolǵandardyń basym bóligi ýly zat paıdalanǵan - statıstıka
ASTANA. QazAqparat Astana ákimdiginiń janyndaǵy «Elorda Aqparat» medıa-resýrsynyń habarlaýynsha, Astanada jylyna 700-den astam adam óz ózine qol jumsaıdy.
Bul - 2016 jylǵy statıstıka. Osy 700 adamnyń ishinde dárigerler men qutqarýshylar 56 adamnyń ómirine arasha túse almaǵany habarlanyp otyr.
«2016 jyly Astanada 703 sýıtsıd faktisi tirkelip, 706 adam zardap shekti. Onyń ishinde 56 adamnyń ómirine arasha túsý múmkin bolmady»,-dep habarlaǵan «109 kezekshi qyzmeti» memlekettik mekemesi.
Ózine qol salyp, ólimge bel býǵan adamdardyń basym bóligi, ıaǵnı 436 adam ýly zattardy paıdalanyp, sonyń ishinde, sirke sýyn iship ólmek bolǵan. 231 adam ózine qol salý arqyly denesine zaqym keltirip (tamyryn kesip, qoldaryn tilip) sýıtsıd jasaýǵa umtylsa, 19 adam asylyp ólmekshi bolǵan.
Derekkóziniń habarlaýynsha tipti bir adam ıne jutý arqyly ómirimen qosh aıtysqysy kelgen eken.
«109» qyzmetiniń málimetine sáıkes, 56 adamdy qutqarý múmkin bolmaǵan. 44 adam asylyp, 11 adam sekirip ólgen, bireýi ózin-ózi tunshyqtyryp o dúnıege attanǵan»,-dep habarlady «Elorda Aqparat».
