Astanada ózge ult ókilderi arasynda Abaı oqýlary ótti
ASTANA. 18 sáýir. QazAqparat /Jasulan Amanbaıuly/ - Búgin Astanada ózge ult ókilderi arasynda «Maqsatym - til ustartyp, óner shashpaq» atty baıqaý ótýde.
Uıymdastyrýshylardyń aıtýynsha, oǵan negizinen JOO-nyń, kolledjder men gımnazııalardyń oqýshylary qatysýǵa nıet bildirgen. Qalalyq deńgeıde ótken sharaǵa 18 ben 30 jas aralyǵyndaǵy 70-ten astam úmitker ótinish túsirdi. Onyń tek úzdik 15-i ǵana aqtyq synǵa iriktelip alyndy. Onda ózge ulttyń ókilderi qazaq tilinde aqynnyń óleńderin, ánderin jáne qara sózinen úzindi oqyp berýi tıis.
Astana qalasy Tilderdi damytý basqarmasynyń bastyǵy Orazkúl Asanǵazynyń aıtýynsha, 1 mamyr - Halyqtar dostyǵy kúnine oraı, basqarma sáýir aıynda 4 is-shara ótkizýdi josparlaýda. Onyń basyn búgin «Maqsatym - til ustartyp, óner shashpaq» degen taqyrypta ótken Abaı oqýlary bastap berip otyr.
Erteń, 19 sáýirdegi kelesi sharada ózge ult ókilderi memlekettik tilden bilimderin jarystyratyn bolady.
«Erteń ózge ult ókilderiniń qazaq tiliniń bilgirleriniń arasynda jarys ótedi. Odan keıingi shara qazaqtardyń orys tili boıynsha bilimin synaýǵa baǵyttalǵan. Osy aptanyń sońynda, juma kúni «Til daryny» baıqaýy ótedi. Ol jerde ultyna qaramaı, 18 ben 30 jas ortasyndaǵy 3 til biletin jastardyń jarysy bolady»,-dep atap kórsetti O. Asanǵazy.
Búgingi Abaı oqýlarynda júldeger atanǵan myqtylar respýblıkalyq synǵa qatysýǵa joldama alady.
