Astanada Ózbekstan elshiligi ǵımaratyn qıratqan buzaqy 3 jylǵa sottaldy

ASTANA. QazAqparat – Astanadaǵy Ózbekstan Respýblıkasy elshiligi ǵımaratyna mas kúıinde basa kóktep kirip, múlikterdi qıratqan elorda turǵyny bas bostandyǵynan aıyryldy, dep habarlaıdy QazAqparat tilshisi qalalyq sottyń baspasóz qyzmetine silteme jasap.

Elordanyń Almaty aýdanynyń №2 soty M. esimdi azamatqa aıyptaý úkimin shyǵardy.

«Bıyl qańtarda M. mas kúıinde Ózbekstan Respýblıkasy elshiliginiń ǵımaratyna kirip, múlikterdi qıratty. Saldarynan elshilikke iri kólemde materıaldyq shyǵyn keldi. Aıyptynyń kinási dálelder men beınebaqylaý kamerasy jazbasymen rastaldy», - delingen qalalyq sottyń habarlamasynda.

Vedomstvonyń aqparatynsha, zań boıynsha aıyptyǵa 3 myńnan 7 myńǵa deıin AEK kóleminde aıyppul salý nemese 3 jyldan 7 jylǵa deıin bas bostandyǵynan aıyrý jazasy qaralǵan.

Sondaı-aq, atalǵan is boıynsha jazany jeńildetetin jaǵdaı joq, kerisinshe mas kúıinde qylmys jasaý aýyr mán-jaı dep tanyldy.

«Sot úkimimen M. esimdi azamat Qylmystyq kodekstiń 202-baby 2-bóliginiń 5-tarmaǵy boıynsha kináli dep tanylyp, 3 jylǵa bas bostandyǵynan aıryldy. Sondaı-aq, aıypty Ózbekstan Respýblıkasy elshiligi ǵımaratyna keltirgen materıaldyq zalaldy ótedi. Odan bólek, sottalýshyǵa jazasyn óteý ornynda maskúnemdikten májbúrlep emdeý sharasy belgilendi», - deıdi Astana sotynan.

Sot úkimi zańdy kúshine endi.