Astanada Ózbekstan elshiligi ashylady
ASTANA. QazAqparat - Búginde Astanada Ózbekstan elshiliginiń jańa ǵımaraty salynyp jatyr. Onyń qurylysy aıaqtalǵannan keıin Ózbekstannyń Almatydaǵy dıplomatııalyq mıssııasy Astanaǵa kóship keledi. Al sol jaqtaǵy qyzmet bas konsýldyq bolyp qalady, dep xabarlaıdy QazAqparat tilshisi Gazeta.uz saıtyna silteme jasap.
Ózbekstannyń syrtqy ister mınıstri Abdýlazız Kamılovtyń aıtýynsha, búginde ózbek azamattarynyń quqyqtaryn qorǵaý maqsatynda Reseıdiń Sankt-Peterbor, Qazan, Rostovtaǵy Don, Ekaterınbor men Vladıvostok qalalarynda konsýldyq qyzmetterdi ashý máselesi pysyqtalyp jatyr. "Biz ulttyq zańnamamyzǵa ózgerister men tolyqtyrýlar engizip, dıplomatııalyq qyzmetimizdi keńeıtetin bolamyz. Bul - Ózbekstan prezıdenti belgilegen negizgi basymdyq. Basty maqsat - ózbek azamattary qaı jerde júrse de, olardyń quqyqtary men múddelerin qorǵaý", - deıdi Kamılov.
Mınıstrdiń sózine qaraǵanda, el azamattarynyń ótinishterin qaraý merzimi de qysqaratyn bolady. Máselen, shetelde júrgen Ózbekstan azamaty óz qujattaryn joǵaltsa, onyń jeke málimetterin naqtylaýǵa ketetin ýaqyt 3 aıdan 7 kúnge deıin azaıady.
