Astanada óz jumysshylaryna 27,8 mln. teńge qaryz 5 kásiporynnyń 3-eýi bankrot dep tanyldy - prokýratýra

ASTANA. 28 qyrkúıek. QazAqparat - Astana qalasynyń prokýratýrasynda ótken «dóńgelek ústelde» eńbek qatynastary salasyndaǵy ózekti máseleler talqylandy.

Atalǵan shara Bas Prokýratýranyń «Jalaqy - ýaqytynda!» jobasyn iske asyrý sheńberinde uıymdastyryldy. Jıynǵa resmı organdardan bólek  azamattardyń eńbek quqyqtaryn buzý faktileri oryn alǵan elordadaǵy 15-ke jýyq kásiporyn basshylary qatysty.

Jıynnyń basty maqsaty  - azamattardyń eńbek quqyqtaryn qorǵaý salasyndaǵy ózara belsendi is-qımyl jasaý, aqparat almasý, túıtkildi máselelerdi jedel sheshý úshin memlekettik organdardyń, kásipodaq uıymdary men jumys berýshilerdiń qyzmetin úılestirý. Kezdesý barysynda qalalyq prokýratýra 2012 jylǵa arnalǵan baqylaý-qadaǵalaý qyzmetiniń nátıjesin jarııalap, jalaqy boıynsha bereshektiń paıda bolý sebepterine de mán bergen. Atap aıtqanda, prokýratýra organdary 2012 jyldyń 8 aıyndaǵy qadaǵalaý qyzmeti barysynda azamattardyń eńbek quqyqtaryn qorǵaý salasynda 47 tekserý júrgizip, nátıjesinde 2537 zań buzýshylyqty anyqtaǵan. Qabyldanǵan prokýrorlyq sharalar boıynsha 25 uıǵarym, zań buzýshylyqty joıý týraly 25 usynys jasalǵan, 1 narazylyq qanaǵattandyrylyp, 31 eskertý berilgen. 2099 azamattyń konstıtýtsııalyq quqyǵy qorǵalyp, 97 adam ákimshilik jaýapkershilikke, 5 adam tártiptik jaýapkershilikke tartyldy.

2011-2012 jyldar aralyǵynda astananyń quqyq qorǵaý organdary jalaqy tólemeý faktisi boıynsha 8 qylmystyq is qozǵasa, onyń ishinde 5 qylmystyq isti Astana qalasynyń prokýratýrasy qozǵaǵan.

Qazirgi ýaqytta elordada 5 kásiporynnyń 290 jumysshy aldyndaǵy jalaqy boıynsha bereshegi 27,8 mln. teńgeni quraıdy. Onyń ishinde 3 kásiporyn bankrot dep tanylyp, konkýrstyq úderister júrgizilýde.