Astanada otyryp oınaıtyn paravoleıbol chempıonatynyń jeńimpazdary anyqtaldy
ASTANA. QazAqparat – Elordada otyryp oınaıtyn voleıboldan respýblıkalyq chempıonat aıaqtaldy, dep habarlaıdy QazAqparat tilshisi.
Bıyl chempıonatqa elimizdiń 10 óńirinen komandalar jınaldy. Onyń qatarynda Atyraý, Batys Qazaqstan, Aqtóbe, Mańǵystaý, Jambyl, Qaraǵandy, Qyzylorda oblystary, Shymkent jáne Astana qalalary bar.
Sońynda Qyzylorda, Atyraý jáne Mańǵystaý oblysynyń komandalary iriktelip, fınalǵa shyqty.
«Voleıboldy otyryp oınaý sport túri retinde 30 jyl buryn paıda boldy. Ásirese sońǵy 10 jylda aıryqsha damyp, álemdik arenaǵa shyqty. Álemde voleıboldy otyryp oınaýdan 78 komanda bar. Olardyń ishinde Irannyń komandasy myqty. Otyryp oınaıtyn voleıboldyń kádimgi voleıboldan aıyrmashylyǵy joq. Erejeleri birdeı deýge bolady. Tek bul jerde múgedektigi bar jandar úshin yńǵaılanǵan. Naqty aıtqanda, aıaǵy joq adamdar oınaıdy. Komanda quramynda 6 adam bolady. Uıymdastyrýshylarǵa alǵys aıtamyz», - deıdi otyryp oınaıtyn voleıbol ulttyq quramasynyń bas bapkeri Baýyrjan Taqaýov.
Ulttyq paralımpıada komıtetiniń bas hatshysy Erlan Súleımenovtiń aıtýynsha, otyryp oınaıtyn voleıbol – paralımpıada sportyndaǵy turaqty oıyn túrleriniń biri.
«Biz úshin bul shara óte mańyzdy. Jalpy, ulttyq, respýblıkalyq týrnırler úzdikterdiń úzdikterin irikteıtin oryn. Bıylǵy týrnır alǵash ret +sport telearnasynda onlaın translıatsııada ótýde. Jusan Bank demeýshiligimen júlde qorymyz bar jáne alǵash ret 1-3-inshi oryn alǵan sportshylarǵa aqshalaı júlde beriledi. Jartylaı fınalda Qyzylorda, Aqtaý jáne Atyraý komandalary oınady. Bul ózderin kórsete alatyn eń myqty komandalar jáne ótken jyldan beri komandalardyń ósip kele jatqanyn kóremiz. Ásirese eki-úsh jyl buryn voleıboldy otyryp oınaı bastaǵan oıynshylar búginde Qazaqstannyń eń myqty komandasyna básekeles bola aldy. Munyń bári paralımpıadalyq sport retinde otyryp oınaıtyn voleıboldy ǵana emes, jalpy paralımpıadalyq qozǵalysty nasıhattaý úshin jasalýda. Qazir parasportqa kóp kóńil bólinedi, bul Qazaqstannyń týyn jeńis tuǵyrynda jıi kóterýge yqpal etedi. Buǵan dálel – bizdiń Tokıodaǵy Paralımpıadadaǵy jeńisimiz», - dedi Erlan Súleımenov.
Komıtet ókili búgin fınalda oınaıtyn paravoleıbol quramasy álemdegi eń úzdik 7 komandanyń qataryna enetinin atap ótti. Jaqynda olar álem chempıonatynan oralyp, 7-shi orynǵa ıe boldy. Olar Parıjdegi Olımpıada lıtsenzııasy úshin kúresedi.
Aıta ketsek, búginde Jusan Bank kóptegen áleýmettik jobalarǵa demeýshilik etedi jáne paralımpıadalyq sport túrlerin alǵash ret qoldap otyr. Bul eldegi ınklıýzıvti ortany qalyptastyrýǵa qosqan eleýli úles bolmaq.
«Biz paravoleıboldan Qazaqstan chempıonatyn qoldaý qajet dep uıǵardyq. Óıtkeni bul sporttyń kádimgi voleıbol sııaqty tanymal bolmaýy – ádiletsizdik. Parasportshylar óz múmkindikterinen asyra eńbektenedi. Sondyqtan olardyń ómiri bizdi shabyttandyrdy. Al banktiń urany – «Saǵan senemiz» – mine, biz osy jigitterge senemiz, olar álemdik paralımpıada alańynda Qazaqstannyń namysyn qorǵaıdy. Rasynda da, bul úlken shabyt beretin oqıǵa, biz keıde óz kúshimizge senbeımiz, bir isti jasamaý úshin myńdaǵan syltaý tabamyz, dál osy jigitter esh shekteýge qaramastan alǵa umtylý keregin kórsetedi», - dedi Jusan Bank PR dırektory Gaýhar Kerimova.
Jarys nátıjesinde Atyraý komandasy birinshi oryn ıelenip, 1 mln teńge júlde alsa, ekinshi oryn úshin – Qyzylorda komandasyna 500 myń teńge, úshinshi oryn úshin – Mańǵystaý komandasyna 250 myń teńge aqshalaı syıaqy berildi.
Sonymen birge, saıysta kózge túsken úzdik oıynshylar marapattaldy. Mańǵystaýlyq Erbolat Altaev «Úzdik tosqaýylshy», atyraýlyq Baýyrjan Sartaev – «Úzdik baılanystyrýshy», Qýanysh Tájikov – «Úzdik lıbero», Perdebaı Namuratov – «Úzdik shabýylshy» jáne qyzylordalyq Erik Qasqabaev «Úzdik qabyldaýshy» nomınatsııalaryn jeńip aldy.
