Astanada ótip jatqan BaiQymyz-2026 festıvaline qalaı barýǵa bolady
ASTANA. KAZINFORM – Elordada BaiQymyz-2026 halyqaralyq gastronomııalyq festıvaline baılanysty qoǵamdyq kólik qozǵalysyna ýaqytsha ózgeris engiziledi, dep habarlaıdy qala ákimdiginiń resmı saıty.
11-12 shilde kúnderi Astanada qymyzdan dám tatý, kontsertter, ulttyq oıyndar, kórmeler men etnomádenı is-sharalardy qamtıtyn BaiQymyz-2026 halyqaralyq gastronomııalyq festıvali ótedi.
Uıymdastyrýshylar turǵyndar men qala qonaqtaryna festıval ótetin «Qazanat» ıppodromyna qoǵamdyq kólikpen barýǵa keńes beredi.
Osyǵan baılanysty 7-13 shilde aralyǵynda №18, №37 jáne №303 avtobýs baǵyttarynyń qozǵalys syzbasy ýaqytsha ózgertildi. Bul kezeńde atalǵan avtobýstar «Qazanat» ıppodromyna deıin qatynaıdy.
Sonymen qatar festıval ótetin 11 jáne 12 shilde kúnderi osy baǵyttardyń jumys ýaqyty uzartylyp, avtobýstar saǵat 23:00-ge deıin júredi.
Aıta keteıik, BaiQymyz-2026 festıvali 11-12 shilde kúnderi «Qazanat» ıppodromynda ótedi. Baǵdarlama aıasynda «Úzdik qymyz» halyqaralyq baıqaýy, jylqynyń ulttyq tuqymdary kórmesi, qolóner jármeńkesi, qazaqstandyq ónerpazdardyń kontserti, ulttyq jáne zamanaýı sport túrlerinen jarystar uıymdastyrylady.
