Astanada ótken ultaralyq aıtysta Eldana Gaberman kúmis júldeger atandy
ASTANA. KAZINFORM — Erkeǵalı Rahmádıev atyndaǵy kontsert zalynda Qazaqstan halqynyń birligi men qazaq tiliniń qudiretin aıqyn kórsetken «Altyn shańyraq» respýblıkalyq ultaralyq aıtys ótti.
Aıtystyń basty ereksheligi — sahnaǵa tanymal aqyndar men osy ónerdi meńgerip júrgen shákirtterden quralǵan 12 juptyń shyǵýy boldy. Barlyǵy 12 sóz saıysy ótip, qatysýshylar tapqyrlyqtary men sýyryp salmalyq qabiletterin kórsetip, sóz saptaý sheberlikterimen erekshelendi.
Sahnaǵa shyqqan jas talanttar — ártúrli etnos ókilderi. Degenmen olardyń sózge júıriktigi, ulttyq dástúrdi tereń túsinýi jáne til tazalyǵy qazaq mádenıetimen bite qaınasqanyn dáleldedi.
Aıtystyń jarqyn juldyzdarynyń biri — Qarýly kúshterdiń maqtanyshy, Ulttyq áskerı-patrıottyq ortalyǵy Ortalyq ansambliniń ánshisi Eldana Gaberman boldy.
Eldana — ulttyq ónerdi ulyqtaǵan, keń dalanyń erkin rýhyn boıyna sińirgen naǵyz óner ıesi. Ol áskerı-mýzykalyq ujymda 16 jyldan beri eńbek etip, ásem únimen áskerı qyzmetshilerge rýh berip keledi.
Sahnaǵa Eldana óziniń ustazy, belgili aqyn Iran-Ǵaıyp Kúzenbaevpen birge shyqty. Olarǵa almatylyq, nıgerııalyq Danıel Djeıms pen onyń ustazy Ómirjan Kópbosyn qarsylas boldy.
«Qyz ben jigit» aıtysynda jeńil ázil, Otandy qorǵaý, memlekettik tildiń mártebesi jáne týǵan jerge degen sheksiz súıispenshilik taqyryptary úılesim tapty.
Áriptesin qoldaýǵa áskerı qyzmetshiler men sarbazdar keldi. Dombyranyń ár únine erekshe qurmetpen qulaq túrgen áskerı formadaǵy kórermender keshtiń shyraıyn asha tústi. Jaýynger dostarynyń qoldaýy Eldananyń sahnada senimdi óner kórsetýine úlken demeý boldy.
Aıtystyń nátıjesinde sýyryp salmalyq sheberligin joǵary deńgeıde kórsetip, kórermenge poezııanyń sulýlyǵyn jetkize bilgen Eldana Gaberman júldeli ekinshi orynǵa ıe boldy.
— Men ultym nemis bolǵanymen, júregim qazaq dep soǵady. Men úshin aıtys — jaı ǵana jarys emes, bul qazaq halqyna jáne týǵan tilime degen qurmet, — dedi kúmis júldeger.
Bul kesh qazaq tiliniń halyqtardy biriktiretin shynaıy kúsh ekenin taǵy bir márte dáleldep, ár adam bir shańyraq astynda qazaq mádenıetinen óz ornyn taba alatynyn kórsetti.
Aıta ketelik Memleket basshysy Qasym-Jomart Toqaev Qazaqstan halqynyń birligi merekesimen quttyqttaǵan edi.
