Astanada ótken respýblıkalyq báıgege 8,5 myńnan asa kórermen jınaldy
ASTANA. KAZINFORM — Elorda mańyndaǵy «Qazanat» atshabarynda Memlekettik rámizder kúni men Qurban aıt merekesine oraı respýblıkalyq báıge jarysy ótti. Ony tamashalaýǵa 8,5 myńnan asa kórermen jınaldy, dep habarlaıdy elorda ákimdiginiń resmı saıty.
Dúbirli dodaǵa elimizdiń túkpir-túkpirinen kelgen 50-ge jýyq tańdaýly tulpar men tájirıbeli shabandoz qatysty. Sáıgúlikter 9 shaqyrymdyq «Qunan» báıge, 16 shaqyrymdyq «Top» báıge jáne 25 shaqyrymdyq «Alaman» báıge boıynsha baq synap, jeńimpazdar anyqtaldy. Jeńimpazdar men júldegerlerge qomaqty aqshalaı syıaqylar, eki birdeı «Changan» avtokóligi men bir bólmeli páter tabystaldy.
Uıymdastyrýshylardyń aıtýynsha, báıge kúni atshabarda anshlag baıqalyp, trıbýnalar men kórermender alańy lyq toldy. Bul kórsetkish respýblıkalyq deńgeıdegi at sporty jarystaryna degen halyq qyzyǵýshylyǵynyń jyldan jylǵa artyp kele jatqanyn ańǵartady.
Ulttyq sportty ulyqtaǵan aýqymdy is-shara tartysty básekemen ǵana emes, kórermenderiniń kóptigimen de erekshelendi. 8,5 myńnan astam adamnyń basyn qosqan báıge ulttyq qundylyqtardy nasıhattaýdyń jáne at sportyna degen halyq yqylasyn arttyrýdyń mańyzdy alańyna aınaldy.
Osydan buryn qazaqtyń ulttyq sporty álemdik arenada moıyndala bastaǵanyn jazǵanbyz.
