Astanada para hokkeıden álem chempıonaty aıaqtaldy

Astanada ótken para hokkeıden álem chempıonaty máresine jetti. Elimizde alǵash ret ótken álem chempıonatyna barlyǵy 6 komanda qatysty, dep habarlaıdy Kazinform elorda ákimdiginiń resmı saıtyna silteme jasap.

Fınlıandııa, Slovakııa, Shvetsııa, Ulybrıtanııa, Japonııa jáne Qazaqstan quramalary óner kórsetti.

Qazaqstan ulttyq quramasynyń keńesshisi Nıkolaı Sharshýkovtyń aıtýynsha, oıyn barysynda Qazaqstan quramasy V dıvızıondyq ornyn saqtaı otyryp, álemdik deńgeıdegi dodany sátti aıaqtady.

«Kez-kelgen jarysta ár komanda jeńiske jetýge umtylady. Onyń ústine 2021 jyly ǵana qurylǵan komanda bir jyl ishinde S dıvızıonynda 2-oryn aldy.
Oıynshylar osy qarqynmen joǵarǵy lıgadan úmitti boldy. Degenmen jarys barysy Qazaqstannyń laıyqty deńgeıin kórsetti. Aldaǵy ýaqyttaǵy josparymyz 2024 jyly V dıvızıonynyń kezekti oıyndary ótedi. Ázirge bizdiń maqsatymyz – álem chempıonatyna tyńǵylyqty daıyndalyp, bıylǵyǵa qaraǵanda jaqsy nátıje kórsetý», - deıdi Nıkolaı Sharshýkov.

Chempıonattyń sońǵy oıynynda elimizdiń sportshylary Ulybrıtanııa komandasyn 4:3 esebimen jeńip, týrnırdiń jalpy reıtınginde tórtinshi orynǵa turaqtady.

Jarystyń nátıjesi boıynsha Japonııa men Slovakııa qurama komandalary A-pool para hokkeıden álem chempıonatyna qatysýǵa joldama aldy.

Jarystyń uıymdastyrýshylary – QR Týrızm jáne sport mınıstrligi, SportQory, «Samuryq-Qazyna» AQ, «Qazaqstan halqyna» qory, Qazaqstannyń Ulttyq paralımpıada komıteti jáne Astana qalasynyń sport basqarmasy.