Astanada ótken fotokórmede Uly Jibek joly boıyndaǵy elderdiń mádenıeti kórsetildi
ASTANA. QazAqparat - Búgin 21 jeltoqsanda Astana qalasy Nazarbaev ýnıversıtetinde fotoóner sheberleriniń úzdik týyndysy - «Uly jibek jolyndaǵy Islam mádenıeti jáne turmysy» atty alǵashqy halyqaralyq kórme ashyldy.
Kórmeni Qazaqstan-duńǵan qaýymdastyǵy men Qazaqstandaǵy Qytaı elshiliginiń qoldaýymen QHR Nınsıa Dostyq jáne Mádenıet Halyqaralyq Islam Qaýymdastyǵy uıymy uıymdastyrdy.
Kórmeniń maqsaty qazaqstandyqtardy álemniń 65 elinde jasalǵan fotoóner sheberleriniń úzdik jumystarymen tanystyrý. Bul 200 foto 80 myń jumystyń ishinen tańdap alyndy. Uıymdastyrýshylardyń aıtýynsha, munda ár eldegi ıslam halyqtarynyń ómiri, turmysy, mádenıeti tolyq ári tıimdi kórsetiledi.
Ashylý rásiminde Qazaqstanda QHR Elshiliginiń isterine Ýaqytsha senim bildirilgen Lıý Tszıanpın hanym 2013 jyly Nazarbaev Ýnıversıtetinde «Jibek joly ekonomıkalyq beldeýi» bastamasy aıtylǵannan keıin Qazaqstan men Qytaı arasyndaǵy yntymaqtastyq eki esege artqanyn atap ótti. 
Búginde Qazaqstan Qytaıdyń strategııalyq áriptesi, tatý kórshisi. Eki el úkimetteri «Nurly jol» men «Jibek jolynyń ekonomıkalyq beldeýi» baǵdarlamalarynyń túıisýi josparyn ázirledi, ol eki el halqynyń damýy men gúldenýine yqpal etedi.
«Bizdiń mindetimiz - ár halyq, álem elderindegi ıslam álemin kórsetý, - dedi QDQ Prezıdenti H.Sh. Dáýirov. Jınalǵan qaýym ıslamnyń keremet álemi, taǵdyry, erekshe sátteri túsirilgen fotosýretterdi tamashalady. Sýretterde Jibek joly halyqtarynyń da mádenıetin tanyp-bilýge bolady. 
Bul fotokórme QR Táýelsizdiginiń, Qazaqstan men Qytaı arasyndaǵy dıplomatııalyq qatynastardyń ornaýynyń 25 jyldyǵyna, sondaı-aq Jibek joly Ekonomıkalyq beldeýi bastamasynyń 3-jyldyǵyna arnaldy.
Kórmege Qonaev kóshesi, 14-úı boıynsha «Has Sanat» fotogalereıasyna 22-24 jeltoqsan aralyǵynda nıet bildirýshiler kelýlerine bolady.
