Astanada ótken «Dinder terrorızmge qarsy» halyqaralyq konferentsııasy materıaldarynan jınaq ázirlendi
Forým Álemdik jáne dástúrli dinder lıderleri Seziniń aıasynda ótti jáne qyryqtan astam elden kelgen parlamentshiler, dinı qaıratkerler, halyqaralyq uıymdardyń basshylary men sarapshylar bir ústeldiń basyna jınaldy.
Basylymda Qazaqstan Respýblıkasy Prezıdentiniń konferentsııaǵa qatysýshylarǵa úndeýi, mártebeli meımandar men sharaǵa qatysýshylardyń sózderi, sondaı-aq Qorytyndy málimdemeniń mátini bar.
Basylymnyń kirispe sózinde Senat tóraǵasy Qasym-Jomart Toqaev BUU Bas Assambleıasynyń 70-shi sessııasynda Prezıdent Nursultan Nazarbaevtyń terrorızmge qarsy álemdi eleń etkizgen birqatar usynystary jarııa etilgen mańyzdy sózinen keıin osy forýmdy shaqyrý ıdeıasy týyndaǵanyna nazar aýdardy. Óristegen pikirsaıystyń ereksheligi týraly aıta kelip Q.Toqaev: «Dinı qaıratkerlerdiń terrormen kúrestegi negizgi rólin aıqyndaýmen qatar konferentsııada antıterrorıstik qyzmettiń parlamenttik ólshemin nyǵaıtý da kózdeldi. Halyqaralyq qaýymdastyq terrorızmge qarsy is-qımyldy quqyqtyq turǵydan jetildirip, osy qaterge qarsy kúreste parlamenttik dıplomatııa áleýetin iske qosýy qajet», - dep atap ótti.
Múddeli pikiralmasý barysynda ekstremızm men terrorızmniń ózekti máselelerin sheshýge baǵyttalǵan is júzindegi qadamdardyń aýqymdy salalary talqylandy. Konferentsııaǵa qatysýshylardyń pikirlerin qorytyndylaı kelip Q.Toqaev jastardyń áleýmettik jáne ekonomıkalyq jaǵdaıy, bilim, mádenıet, bala tárbıesi, dinı saýattylyq, quqyq ústemdigi, buqaralyq aqparat quraldary men áleýmettik jelilerde ádep qaǵıdalaryn saqtaý máseleleri qamtylǵan keshendi sharalar qajet ekenin atap ótti.
Konferentsııa materıaldary qazaq, orys jáne aǵylshyn tilderinde jaryq kórdi. BAÁ Parlamenti tóraǵasynyń, Reseı, Ázerbaıjan zań shyǵarý organdary tóraǵalary orynbasarlarynyń, Ulybrıtanııa, Frantsııa, Germanııa, Italııa, Aýǵanstan jáne basqa memleketter parlamentteri depýtattarynyń, EKPA, EQYU, AÓSShK, ShYU sekildi qurylymdardyń basshylary men jetekshi mamandarynyń mazmundy baıandamalary oqyrmandardyń yqylasyn týǵyzady. Islam, hrıstıan, býddızm jáne basqa da dinder qaıratkerleriniń sózderinen terrorızm zulmatyna dinı turǵyda qarsy turýdaǵy mańyzdy ıdeıalardy tabýǵa bolady.
Kitap halyqaralyq uıymdarǵa, bizdiń elimizdegi jáne shet elderdegi dinı jáne qoǵam qaıratkerlerine, saıasatkerler men sarapshylarǵa taratylatyn bolady.
