Astanada ótken brendbýk baıqaýynyń jeńimpazyna 8 mln teńge tabystaldy
ASTANA. QazAqparat - Búgin Astana qalasynyń 20 jyldyq mereıtoıyna oraı ótkizilgen brendbýk baıqaýynyń jeńimpazyn marapattaý rásimi ótti, dep habarlaıdy QazAqparat.
«Búgin Astana qalasynyń 20 jyldyq mereıtoıyna arnalǵan baıqaýdyń qorytyndysy belgili boldy. Biz úshin bul baıqaýdyń mańyzy óte zor. Óıtkeni, tańdap alynǵan brendbýk bıyl ótetin barlyq mańyzdy sharalarda keńinen paıdalanylady. Baıqaýǵa kóptegen jobalar kelip tústi», - dedi jeńimpazdardy marapattaý rásiminde Astana qalasy ákimdiginiń apparat basshysy Berik Jekenov.
Onyń aıtýynsha, baıqaýǵa 62 ótinim berýshiden 150-den astam jumys kelip túsken. Joba usynǵan avtorlardyń qatarynda elordadan basqa elimizdiń barlyq óńirlerinen dızaınerler bolǵan. Ázirese jastar joǵary belsendilik kórsetken. Nátıjesinde baıqaý komıssııasy 8 jobany Astananyń 20 jyldyq mereıtoıyn uıymdastyrý jáne ótkizý jónindegi respýblıkalyq komıssııa qaraýyna jibergen.
«Barlyq jobalardy qarap talqyladyq. Óz pikirimizdi bildirdik. Qorytyndysynda Sizder jeńimpaz dep tanyldyńyzdar. Barlyqtaryńyzdy quttyqtaımyn. Aıta keterligi, mundaı nyshandy jasaý óte qıyn. Sizderdi talantty, óz isiniń maıtalmany dep sanaımyn», - dedi baıqaý komıssııasynyń múshesi Saǵyndyq Janbolatov.
Shara barysynda jumysy úzdik dep tanylǵan 8 dızaıner marapattaldy. Onyń ishinde «KazıÝnıon Konsalt» JShS-niń artdırektory Aqmaral Espenbetov bas júldege ıe bolyp, elordanyń mereıtoılyq sharalarynda usynǵan logotıp qoldanylatyn bolady.
«Logotıpti bir aıǵa jýyq daıyndadyq. Jumysymyz Astana qalasyn pash etedi. Onda suńqar qusy beınelengen. Úsh jumys usynǵan edik. Sonyń biri jeńimpaz atanyp otyr. Óte qýanyshtymyz. Elimizdiń damýyna úles qosqanymyzdy maqtan etemiz», - dedi baıqaý jeńimpazy.
