Astanada ótken «Astana Piano Passion» Halyqaralyq jas pıanıster baıqaýynyń jeńimpazdary belgili boldy
ASTANA. 16 mamyr. QazAqparat - Búgin Astana qalasynda 10-16 mamyr aralyǵynda І Halyqaralyq klassıkalyq mýzyka festıvali aıasynda ótken "Astana Piano Passion" Halyqaralyq jas pıanıster baıqaýynyń qorytyndylary shyǵarylyp, «Qazaqstan» OKZ-da gala-kontserti boldy.
«Qazir kóp adamdar álemdegi eń mańyzdy qundylyqtardyń biri - mádenıet ekenin túsine bermeıdi. Al bizdiń Qazaqstanda osyndaı sharany uıymdastyryp, ótkizýimiz - úlken jetistik. Endi bizde fortepıano mýzykasyn kúlli álemge pash etetin jańa komanda bar. Bir maqtanarlyǵy, bul komanda Astanada quryldy!», - dep atap ótti Reseıdiń halyq ártisi, qazylar alqasynyń tóraǵasy Denıs Matsýev.
Qatysýshylardyń ónerlerin bedeldi halyqaralyq qazylar alqasy baǵalady, olardyń quramynda Qazaqstan Respýblıkasynyń, QHR, Ońtústik Koreıanyń, AQSh, Eýropanyń jáne Reseıdiń ókilderi bar.
Jalpy júlde qory - 50 000 AQSh dollaryn qurady. Sondaı-aq, Astana qalasynyń ákimi atynan, baıqaýdyń kórkemdik jetekshisi atynan berilgen arnaıy júldeler de boldy.
Konkýrs nátıjeleri qatysýshylardyń jas erekshelikterine qaraı 3 topqa jikteldi. Kishi top boıynsha birinshi oryndy Varvara Kýtýzova (Reseı) men Shýan Ern Lı (Avstralııa) enshilese, orta top boıynsha ıÝnıke Kýrokı (Japonııa) men Aleksandr Malofeev (Reseı) birinshi orynǵa taban tiredi. Al úlkender tobynan reseılik Aleksandr Kýtýzov jeńiske jetti.
