Astanada ótken alǵashqy UNICEF Charity Run qaıyrymdylyq júgirisine 2000 adam qatysty
ASTANA. KAZINFORM – Búgin Astananyń Botanıkalyq baǵynda 2000 adam, sonyń ishinde balalar men múgedektigi bar jandar Qazaqstanda ınklıýzıvti qoǵam qurý ıdeıasyn qoldaý maqsatynda BUU Balalar qorynyń (ıÝNISEF) alǵashqy «UNICEF Charity Run» qaıyrymdylyq júgirisine jınaldy.
Qatysýshylar 2, 5 jáne 10 shaqyrymdyq qashyqtyqty baǵyndyrdy. Máre syzyǵyna balalar men eresekter, kásipqoı sportshylar men áýesqoılar, januıalar men belsendi qoǵam ókilderi shyqty.
Týrızm jáne sport mınıstrligi málimetinshe, balalar men múgedektigi bar azamattar úshin jarysqa qatysý tegin boldy. UNICEF Charity Run aıasynda jınalǵan barlyq qarajat ıÝNISEF-tiń Qazaqstandaǵy árbir balaǵa teń múmkindik syılaıtyn ınklıýzıvti qoǵam qalyptastyrý baǵdarlamasyn qoldaýǵa baǵyttalady.
Árbir shaqyrym — teń múmkindikter jolynda
Búginde Qazaqstanda 120 myńǵa jýyq múgedektigi bar bala ómir súrip jatyr. Degenmen ınklıýzııa — bul tek kedergisiz fızıkalyq orta qalyptastyrý ǵana emes. Bul — árbir balanyń sapaly bilim alýyna, sportpen aınalysýyna, jan-jaqty damýyna, qurdastarymen erkin til tabysyp, óz ortasynyń ómirine tolyqqandy aralasýyna jasalǵan múmkindik.
2024 jylǵy MICS¹ ulttyq zertteýiniń nátıjeleri de balany erte jastan qoldaýdyń aıryqsha mańyzdylyǵyn dáleldeıdi: elimizde 2 men 4 jas aralyǵyndaǵy árbir tórtinshi balanyń damý deńgeıi kútilgen kórsetkishterge áli jetpeıdi. Bul derekter qajetti kómek pen qoldaý ár balaǵa qoljetimdi bolýy úshin memlekettiń, qoǵamnyń, otbasylar men seriktesterdiń birlese kúsh biriktirýi qanshalyqty mańyzdy ekenin aıqyndaı túsedi.
— Memleket basshysy Qasym-Jomart Toqaev buqaralyq jáne balalar sportyn damytýǵa, halyq úshin sporttyń qoljetimdiligin arttyrýǵa erekshe kóńil bólip keledi. Buqaralyq sportty damytý – memlekettik saıasatynyń basym baǵyttarynyń biri. Prezıdent tapsyrmalary aıasynda elimizde sportpen turaqty aınalysýǵa jaǵdaı jasaý, zamanaýı ınfraqurylym qalyptastyrý jáne balalardy sportqa keńinen tartý baǵytynda júıeli jumystar júrgizilip jatyr. Búginde Qazaqstanda halyqtyń 44,5%-y dene shynyqtyrýmen jáne sportpen júıeli túrde aınalysady. Aldymyzda naqty mindet – 2029 jylǵa qaraı halyqtyń sportpen shuǵyldaný deńgeıin 50%-ǵa jetkizý. UNICEF Charity Run memlekettiń, halyqaralyq uıymdardyń, bıznestiń jáne azamattyq qoǵamnyń ortaq kúsh-jigeri sportty barshaǵa qoljetimdi etetin qolaıly ortany qalaı qalyptastyra alatynyn aıqyn kórsetti. Sondyqtan buqaralyq sportty damytý, onyń ishinde balalar men jasóspirimderge, aýyl turǵyndaryna sportty barynsha qoljetimdi etý baǵytyndaǵy jumysty júıeli túrde jalǵastyramyz, — dep atap ótti Týrızm jáne sport mınıstri Erbol Myrzabosynov.
— Inklıýzııa qarapaıym ári mańyzdy qaǵıdattan bastalady: balanyń múmkindikteri múgedektiktiń bar-joǵymen shektelmeýi tıis. Bizdiń ortaq muratymyz — árbir balanyń bilim alyp, damýyna, sportpen shuǵyldanyp, qoǵamnyń teń quqyly ári belsendi múshesi bolýyna qolaıly jaǵdaı jasaý. UNICEF Charity Run arqasynda jınalǵan qarajat seriktesterimizben birge Qazaqstandaǵy osy ıgi jumysty odan ári jalǵastyrýǵa jol ashady, — dedi ıÝNISEF-tiń Qazaqstandaǵy ókili Rashed Mustafa Sarvar.
Astana halyqaralyq ıgi dástúrge qosyldy
ıÝNISEF-ti qoldaýǵa arnalǵan qaıyrymdylyq júgiristeri, marafondar men túrli sporttyq bastamalar ár jyldary álemniń Dýbaı, London, Nıý-Iork, Sıdneı, Gonkong jáne Mınsk sekildi iri qalalarynda ótkizilip keledi.
2026 jyly osynaý jahandyq dástúrge alǵash ret Astana qalasy da qosyldy. Elordada UNICEF Charity Run jarysyn jyl saıyn ótkizip, adamdardy sport pen balalarǵa degen janashyrlyq tóńireginde biriktiretin qalalyq izgi dástúrge aınaldyrý josparlanyp otyr.
Alǵashqy UNICEF Charity Run sheńberinde qatysýshylar úsh qashyqtyq boıynsha baq synady. 2 shaqyrymdyq júgiris 7-15 jas aralyǵyndaǵy balalarǵa arnalsa, 16 jastan asqan qatysýshylar 5 nemese 10 shaqyrym qashyqtyqty tańdaý múmkindigine ıe boldy. Sonymen qatar balalar úshin arnaıy oıyn-saýyq pen belsendilik baǵdarlamasy uıymdastyryldy.
Japonııada Super Mario stılindegi júgirý jarysy ótetinin jazǵan edik.
