Astanada ótken agroforýmda AÓK salasynda yntymaqtastyqty keńeıtý máselesi talqylandy
Forým «Qazaq Eli» halyqtyq palatasy bastamasymen «Bir beldeý, bir jol» Jibek joly ekonomıkalyq beldeýin qalyptastyrý jónindegi memlekettik baǵdarlamany júzege asyrý aıasynda «Jibek Joly» saýda palatasymen birlesip ótkizildi.
Forýmnyń negizgi maqsaty - Qazaqstannyń agroónerkásip salasynda halyqaralyq yntymaqtastyqty keńeıtý. Jıyndy «Qazaq Eli» halyqtyq palatasy basqarmasynyń tóraǵasy Baqytbek Nuǵyman quttyqtaý sózben ashty.
Onda L.N.Gýmılev atyndaǵy EUÝ kafedrasynyń professory J.Taıbazarov pen Qazaqstannyń Ulttyq bankisiniń tuńǵysh tóraǵasy Ǵ.Baınazarov baıandama jasap, kelýshilerge Qazaqstan agroónerkásip kesheniniń damý qarqyny jáne ony sheteldik ınvestorlardyń qoldaý mehanızmimen tanystyrdy. Sondaı-aq, basqosý barysynda Ekonomıkalyq yntymaqtastyqtyń Evrazııalyq ujymy bas hatshysynyń orynbasary Dje Jan (QHR), « Invictus Trading» dırektorlar keńesiniń tóraǵasy Krıs Iohansen, «Nýro Vorarlber» kompanııasynyń qyzmetkeri Olga Henıkshnabl jáne basqalary sóz sóılep, atalmysh salany damytýǵa qatysty oılarymen bólisti.
Bul bas qosý barysynda birlesken óndiristi ınvestıtsııalaýdaǵy, qazirgi saýda júıesindegi, Qazaqstannyń barlyq aýmaqtaryndaǵy agrarlyq sektor damýyna baǵyttalǵan kapıtaldyń erkin aınalymyndaǵy yntymaqtastyqtyń perspektıvalary qaraldy.
Forým jumysyna Eýropa men Azııa qurlyqtarynyń (Norvegııa, AQSh, Italııa, Nıderlandy, Aýstrııa, Qytaı jáne basqalary) ózderin Qazaqstannyń agrarlyq sektoryna qarjylyq qoldaýshy retinde kórsetip júrgen jıyrmadan astam iri kompanııalary, elimizdiń barlyq oblystarynyń agroónerkásip kesheniniń orta jáne shaǵyn bıznes ókilderi qatysty.
Sondaı-aq, elimizdiń memlekettik jáne ǵylym qaıratkerleri, halyqaralyq uıymdardyń, qarjy ınstıtýttarynyń, BAQ pen memlekettik emes uıymdardyń ókilderi de shaqyrylyp, pikirlerin ortaǵa saldy.
Sharanyń sońynda forýmnyń usynysy qabyldanyp, agroforýmǵa qatysýshy kásipkerlermen birlesken memorandýmǵa qol qoıyldy.